Лекин ҳозир кўриб турганларим ҳақида қисқача ёзмасам бўлмайди. Эски даврни ҳам кўрдим. Мураббийларда "солидарность" бўларди. Юрий Саркисян "Нефтчи"да ишлаб турганида Баҳром Ҳакимов Фарғона ҳокимини олдига бориб мени Вазгеновични ўрнига қўйинг демаган. Виктор Жалилов ишлаётган пайти Равшан Муқимов "Навбаҳор"га ўзини тавсия қилмаган. Ёки Тўра Шоймардонов "Локомотив"ни бошқараётганда Усмон Тошев "темирйўллар"га бориб бошлиққа "мени "Локомотив"га бош мураббий қилинг, хизматингизга тайёрман", деб қўлини кўксига қилиб турмаган, ғурур бўлган барча мураббийларда! Тўғри, гуруч курмаксиз бўлмаган.

Айнан шулар даврида биз росмана футбол кўрдик! Ҳозирчи, ҳозир кўп эшитаяпман. Ҳамкасбининг ўрнига акахонларни ишга солиб жойга эга чиқишга бўлаётган ҳаракатларни. Ҳамкасбининг инқирозини кутаётган баъзи мураббийчалар чиқиб қолди. Эртага кўзга қандай қараш ҳақида ўйлаяпсизми?

Демак Сизни фақат пул қизиқтираётган эканда, нима бўлса ҳам мураббий бўлсам дейсиз? Футболда бошқа лавозимлар ҳам бор. Скаут бўлинг, болалар мактабида бошқарувчи бўлинг, техник директор лавозими бор.

Абрамовдан ўрганинг, қилич келса ҳам бошини эгмайди. Ўша ёмон Бабаян ҳам бировга иш сўраб бормаган, ваҳолангки "Пахтакор"да ишлаган пайти анча баққуват жамоалар бўлган. Инилеевдаги камтарлик қолмаяпти. Жалилов ҳам бировнинг мушугини "пишт" демаган. Мирсодиқов ҳеч қачон ҳамкасбининг оёғига болта урмаган. Ҳайдаров фақат чақирсаларгина борган. Қосимовда кўрдик, қийин паллада ҳам кетмагани. Ундан аввал 2 йил сабрли бўлди. Ҳозирги аксар ёш мураббийлар эса...

Бундай гап сўзлар кўпайиб кетди. Эртага бу мураббий футболчига ҳалолликни ўргата оладими, футболчи биладику ҳаммасини. Ичида "ўзингни тўғирлаб ол аввал", демайдими?

Ана шунақа.

Мураббийлар, Сизларга нима бўлаяпти?