Ушбу учрашувдан сўнг терма жамоамиз мураббийи Нодир Элибоев фикрларини билдириб ўтди.

"Характер кўрсата олдик. Ҳисоб 0:2 бўлгунигача иккинчи рақам остида ўйнашга мажбур бўлдик. Бу биз томондан берилган кўрсатма эди. Шундан сўнг босимни кучайтирдик, ҳужумлар сонини оширдик. Шуни эвазига ғалаба қозондик, деб ўйлайман.

Биринчи ўйинда Венесуэла бизни яхши ўргангани кўриниб турди. Иккинчи бўлимга бошқача руҳиятда майдонга тушди. Бу учрашувда эса агрессив ҳаракат қилишди. Биз эса аксини қилдик ва ҳимояга эътибор қаратдик. Ҳисобда ортда бораётганимизда йигитлар ҳақиқий ирода кўрсата олишди.

Ҳозирда ўйинчиларга ҳордиқ чиқариш имконини берамиз. 3 июль санасидан яна йиғинга киришамиз. Шундан сўнг Жаҳон чемпионатигача тўхташ йўқ. Кейинги ойдаги йиғин тўлиқ ўзимизда ўтади. Август ойида тўлиқ Европада тайёргарликни олиб борамиз. Испания, Португалия, Аргентинага ўхшаган кучли ва номдор рақиблар билан ўртоқлик учрашувларида иштирок этамиз",- дейди Нодир Элибоев.

Нодир Элибоев: "Йигитлар ҳақиқий ирода кўрсатишди"