Ушбу ўйин ғолиби мусобақанинг гуруҳ босқичига йўлланмани қўлга киритади.

Биз клубларимизнинг ОЧЛ плей-оффларида қайд этган натижаларини ёдингизга соламиз.

2012 йил 18 февралида Фарғонанинг "Нефтчи" клуби плей-оффни Дубайда Азиз Ҳайдаров тўп тепаётган "Ал Шабаб" клубига қарши ўтказганди. Ўша ўйинда Юрий Саркисян шогирдлари йирик 0:3 ҳисобида мағлуб бўлишганди. Араблар сафида Исса Обайд (2та) ва Азиз Ҳайдаров гол урганди.

2013 йил Тошкентнинг "Локомотив" клуби плей-оффда ўйнади. 9 февралдаги учрашув Дубайда "Ал Наср"га қарши ўтказилди. Мезбонлар Моримотонинг голи эвазига ҳисобни очишди. Иккинчи бўлимда Виктор Карпенко ҳамда Акмал Холматовнинг тўплари "темирйўлчилар"ни ҳисобда олдинга олиб чиқди. Бунга "Ал Наср" ҳам икки бор жавоб берди. Дастлаб Ҳабиб Фардан, 89-дақиқада эса Лео Лима гол урди - 3:2. Таъкидлаш лозимки, сўнгги гол пенальтидан "Локо" дарвозасига киритилган эди.

Ўтган йил бир йўла икки клубимиз плей-оффда қатнашганди. Қаршининг "Насаф" клуби 8 февралда Дохада "Ал Жайиш" меҳмони бўлиб 1:5 ҳисобида ютқазиб қўйди. Го Сеул Ки хет-трик қайд этди, Нилмар ва Абкер бир мартадан "аждардар" дарвозасига тўп киритишди. Бунга Фарруҳ Сайфиев бир бор жавоб берди холос.

Эртаси куни Тошкентнинг "Локомотив" клуби мусобақа плей-оффидаги иккинчи ўйинини ўтказди. Тошкентдаги "Пахтакор" стадионида Қувайтнинг "Ал Қувайт" клуби меҳмон бўлди. Рақиб сафида Иссам Жемаа хет-трикни расмийлаштирди. "Локомотив"дан Иван Нагаев бир бор гол урди - 1:3.

Кўриб турибсизки ўзбек клублари бу босқичда тўртта ўйин ўтказиб барчасида мағлуб бўлишган.

17 февраль куни "Бунёдкор" бу қора анъанага барҳам бера оладими? Буни ўйин кўрсатиб беради.

Нарзулла Сайдуллаев

ОЧЛ. "Бунёдкор" қора анъанага барҳам бера оладими?