Бунда мухлислар бир қатор қизиқарли учрашувлар гувоҳи бўлишди.

Бу турда кучли бешлик учун ҳаракат қилаётган "Нефтчи" ва "Олмалиқ" ўзаро баҳс олиб бориб, Фарғонада кечган беллашувда майдон эгаларининг қўли баланд келди. Якунига етган турда яна бир эътиборга молик воқеа кузатилди: "Андижон" сафарда ўзининг илк ғалабасини нишлонлади. Тошкентда бўлиб ўтган турнинг марказий баҳси - "Бунёдкор" - "Насаф" қарама-қаршилигида эса ҳисоб очилмади. Биз сайтимиз одатига кўра, тур рамзий терма жамоасини тузиб чиқдик.

ДАРВОЗАБОН
Темур Жўраев ("Шўртан")

ҲИМОЯЧИЛАР
Шукурали Пўлатов ("Нефтчи")
Дарко Станоевич ("Шўртан")
Юрий Рижко ("Навбаҳор")
Анвар Ғофуров ("Бунёдкор")

ЯРИМ ҲИМОЯЧИЛАР
Акмал Холматов ("Нефтчи")
Жасур Ҳасанов ("Локомотив")
Шохруҳ Гадоев ("Насаф")
Шерзод Каримов ("Пахтакор")

ҲУЖУМЧИЛАР
Саид Абдужабборов ("Металлург")
Лочин Солиев ("Андижон")

БОШ МУРАББИЙ: Мухтор Қурбонов

12-тур рамзий терма жамоасидан "Шўртан", "Нефтчи", "Навбаҳор", "Бунёдкор", "Локомотив", "Насаф", "Пахтакор", "Металлург" ва "Андижон" футболчилари жой олишди. Энди чизиқлар бўйича ҳар бир футболчига тўхталиб ўтамиз.

Дарвозага Тўмур Жўраевни қўйдик. "Шўртан" посбони бу турда пенальти қайтариш билан бирга жамоасининг сафарда ғалаба қозонишига муҳим ҳисса қўшди. Натижада воҳа дербисида "Шўртан" "Машъал"ни мағлуб этиб қайтди.

Ҳимоя чизиғидан Шукурали Пўлатов, Дарко Станоевич, Юрий Рижко, Анвар Ғофуров сингари футболчилар жой олишди. Марказий ҳимоячи Шукур Пўлатов "Олмалиқ" билан кечган ўйинни кўтаринки руҳда ўтказди. Ҳам жамоаси ғалаба қозонган бўлса, ҳам ўзи жарима тўпидан чиройли гол урди. Дарко Станоевич эса "Машъал"га қарши баҳсда ғузорликларнинг ҳимоя қўрғони бўлди десак муболаға бўлмайди. Ҳимоячилардан Юрий Рижко билан Анвар Ғофуров ҳам бу турда яхши ўйин намойиш этишди.

Ярим ҳимоядан Акмал Холматов, Жасур Ҳасанов, Шоҳруҳ Гадоев, Шерзод Каримов сингари футболчилар жой эгаллашди. Қизиғи шундаки, бу ўйинчиларнинг барчаси қанот футболчилари ҳисобланади. "Нефтчи" ярим ҳимоячиси Акмал Холматовга алоҳида тўхталиш шарт эмас. Тажрибали ярим ҳимоячи деярли ҳар бир учрашувда ўзини кўрсатиб келмоқда. Холматов охирги турда "Олмалиқ" дарвозасига тўп киритишга муваффақ бўлди. "Локомотив"нинг чап қанот футболчиси Жасур Ҳасанов ҳам яхши ҳаракат қилди. Айнан унинг ягона голи "Локомотив"га навбатдаги уч очкони тақдим этди. Шоҳруҳ Гадоев "Бунёдкор" билан кечган баҳсда мухлисларда илиқ таассурот қолдирган бўлса, Шерзод Каримов жамоасининг сафардан уч очко билан қайтишида катта роль ўйнади.

Ҳужум чизиғига Саид Абдужабборов билан Лочин Солиевни танлаб олдик. "Металлург" ҳужумчиси "Қўқон-1912" дарвозасини икки бор ишғол этди. Лочин Солиев эса "Сўғдиёна" дарвозасига тўп киритиб, "Андижон"нинг илк бор сафардан ютуқ билан қайтишини таъминлади.

12-тур рамзий терма жамоасига бош мураббий сифатида Мухтор Қурбоновни маъқул кўрдик. Негаки Қурбонов бошчилигидаги "Шўртан" охирги пайтларда анча мазмунли ўйин кўрсатмоқда. Ғузорликлар Кубокнинг биринчи ўйинида "Пахтакор"дан устун келишди, кейин эса Муборакда "Машъал"ни мағлуб этишди. Албатта, "Машъал"ни Муборакда енгиш осон эмас, лекин "Шўртан" бу ишнинг уддасидан чиқа олди. Шу сабабли Қашқадарё дербисида ғалаба қозонган Мухтор Қурбоновни рамзий термага бош мураббийи сифатида маъқул кўрдик.

Олий лига. 12-тур рамзий терма жамоаси