Ундан "Локомотив", "Пахтакор", "Бухоро", "Насаф", "Металлург", "Шўртан", "Олмалиқ", "Қизилқум" ва "Сўғдиёна" жамоаси футболчилари ўрин олишди.

Дарвозабон: Зафар Сафоев ("Металлург")

"Металлург"нинг ёш дарвозабони олий лигадаги дастлабки ўйинини "Пахтакор"га қарши ўтказди. Ёш посбон амалдаги чемпионларга қарши жуда яхши ўйнади. Бир қатор вазиятларда у бекободликларни яққол голли вазиятлардан қутқариб қолди. Тўғри жамоаси мағлуб бўлди лекин дарвозабон ярим жамоа эканини унутмаслик керак. Бир ўзи кучли рақибга қарши ўйинда ғалаба қозона олмасди.

Ҳимоячилар: Богдан Хауши ("Бухоро"), Ҳамза Каримов ("Насаф"), Александр Мерзляков ("Пахтакор").

Ҳимоя чизиғига уч нафар футболчини танладик. Муборакда меҳмон бўлган "Бухоро" 2:2 ҳисобидаги дурангга эришди. Ўша ўйинда меҳмонлар сафида руминиялик Богдан Хауши жарима тўпидан гол уриб ҳисобни очганди. Бундан ташқари Хауши ҳимояда "Машъал"нинг бир қатор ҳужумларини қайтариб турди.

Наманганда "Навбаҳор"га қарши ўйнаган "Насаф" сўнгги сонияларда ўтказиб юборилган гол туфайли дуранг ўйнади. Ўша баҳсда қаршиликлар сафида ҳимояда Ҳамза Каримов бўлмаганида "лочинлар" ғалаба қозониб кетишлари ҳам ҳеч гап эмас эди. Ҳамза урилган голда ҳам Мақсудга ҳаммуаллифлик қилди.

Бекободдаги ўйинда ўз қанотида жуда фаол ўйнаган Мерзляков жамоасининг ғалабасига катта хисса қўшди. Саша ҳам ҳимояда, ҳам ҳужумда тезкор ҳаракатлари билан бошқалардан ажралиб турди. Бир неча бор унинг узатган тўпларни ҳужумчилар дарвозага йўллай олишмади.

Ярим ҳимоячилар: Мурод Тошматов ("Металлург"), Санжар Шоаҳмедов ("Локомотив"), Виктор Карпенко ("Шўртан"), Шавкат Саломов ("Олмалиқ")

"Металлург" ярим ҳимоячиси Мурод Тошматов жамоасида энг фаол ўйнаган футболчилардан бири бўлди. Баҳс давомида у ҳужумлар ташкил этишда фаол бўлди. Бундан ташқари бекободликларнинг ягона жавоб тўпини ҳам айнан Тошматов "Пахтакор" дарвозасига киритди.

"Олмалиқ"дан "Локомотив"га ўтган Санжар Шоаҳмедовнинг ўйинида ўсиш кузатилмоқда. У ОЧЛда илк бор қатнашди, голлар урди. Кечаги "Андижон"га қарши учрашувда Санжар гол урди, майдон марказида яхши ўйнади, ҳужумчиларни бир неча марта қулай вазиятга чиқарди.

Ғузорда томошабинлар ҳақиқий голлар шоусига гувоҳ бўлишди. "Шўртан" ва "Олмалиқ" 3:3 ҳисобида жанговор дуранг ўйнашди. Мезбонлар сафида Виктор Карпенко иккита гол урди. Олмалиқликлар сафида эса Шавкат Саломов доимгидек фаол бўлди. Жамоасининг 10 киши бўлиб мағлубиятдан қутулиб қолишида унинг ёрдами катта бўлди.

Ҳужумчилар: Баҳодир Пардаев ("Пахтакор"), Бахриддин Ваҳобов ("Қизилқум"), Жасур Ҳакимов ("Сўғдиёна")

Ҳужум чизиғига уч нафар дублга эришган футболчи киритилди. "Пахтакор" ҳужумчиси Баҳодир Пардаев Бекободдаги ўйинни асосий таркибда бошлади. Бундан олдинги ўйинларда асосан захирадан майдонга тушган футболчи гол урмаганди. "Металлург" билан ўйинда эса бирданига 2та гол уришга эришди.

Бу йилги мавсум тўпурари Бахриддин Ваҳобов гол уришда давом этмоқда. "Қўқон-1912"га қарши баҳсда тажрибали ҳужумчи бу мавсумдаги ўзининг 7 ва 8-голларини урди.

Жиззах клуби ўз тарихида илк бор "Бунёдкор"ни мағлуб этишида Ҳакимовнинг хиссаси жуда катта бўлди. "Сўғдиёна" ҳужумчиси Жасур Ҳакимов "Бунёдкор" билан ўйинда иккита гол уриб "қалдирғочлар"нинг мағлубиятни таъминлади.

Бош мураббий: Даврон Файзиев ("Сўғдиёна")

Тур рамзий терма жамоасига "Сўғдиёна" устози Даврон Файзиев мураббий сифатида киритилди. Даврон Орипович ўз шогирдлари билан "Бунёдкор"ни мағлуб этишни уддалади. Рақиб қандай ҳолатда бўлишидан қатъий назар бу "Бунёдкор" эди. Шу боис Файзиевни тур мураббийи деб топдик.

Олий лига. 8-тур рамзий терма жамоаси