23 ёшли футболчи энди келаси йил олий лигада дебют қилишга яқин турибди. Қўқонликларнинг Ҳайдаровдан умиди катта. Кеча Қўқонга уюштирган сафаримиз чоғида Отабек билан қисқача суҳбатлашдик.

- Отабек, бу йил жамоангиз ниҳоят олий лига йўлланмасини қўлга киритди. Ортда қолган мавсум хусусида фикрингиз қандай?
- Гарчи олий лигага чиққан бўлсакда, олдимизга қўйилган вазифани осонлик билан бажардик дея олмайман. Негаки ҳар бир учрашув биз учун қийин кечди. Айниқса биринчи босқичда Тошкент жамоаларига қарши сафарда ўтказилган ўйинлар, бир-биридан мураккаб бўлди. Иккинчи босқичда эса уларда бироз пасайиш бўлдими ёки бошқа сабабми нисбатан енгилроқ ўтди. Умумий чемпионатни оладиган бўлсак, қизиқарли бўлди.

- “Қўқон-1912” чемпионатни 2-ўринда тугатди. Аслида кичик олтин медалларни кўзлаганмидинглар ёки элита йўлланмаси қўлга киритилса бўлгани қабилида иштирок этдингларми?
- Албатта 1-ўринни эгаллашни барчамиз хоҳлаганмиз. Бунинг учун асосий рақобатчимиз “Шўртан” билан жиддий курашдик. Лекин биринчи босқичнинг бошларида икки бор кетма-кет ўз майдонимизда дуранг қайд этдик. Кейин биринчи босқич ўрталарига келиб яна қимматли очколарни бой бердик. Аксига олиб, “Шўртан” биринчи босқичда очко йўқотмади. Натижада улардан ўтиб кетишнинг имкон бўлмади. Лекин энг асосийси Қўқонга катта футбол қайтди.

- Бу йил иккита мураббий билан ишлашга муваффақ бўлдингиз. Тоҳир Кападзе ва Рустам Абдуллаевнинг иш услублари кўпроқ нимаси билан фарқ қилади?
- Нима десам бўлади, Тоҳир ака ишлаган кезларида ўзимизнинг кучимизга ишониб, ўзимиз хоҳлагандек ўйнардик. Учрашувдан олдин кўрсатма бераётганида ҳаммасини тушунтириб ўтиб кетарди. Рустам ака машғулотларда ишлаб, кўпроқ пас ўйнаш орқали ҳужумга ўтишимиз кераклигини талаб қилади. Тактик жиҳатларга катта эътибор қаратади.

- Бу йил жамоангиз сафида энг кўп гол киритган футболчи бўлдингиз. Мавсум бошида олдингизга қандай шахсий мақсадларни қўйгандингиз?
- Клуб тўпурари бўлганимдан хурсандман. Лекин биласизми мен чемпионат тўпурари бўлишни ҳам истагандим. Тўғри бунга эришиш қийин, лекин мен имкон қадар шу мақсад йўлида ҳаракат қилдим. Афсуски айрим учрашувларда омадим чопмади.

- Иккинчи босқич арафасида таркибга келиб қўшилган Дониёр Усмонов ҳақида нима дейсиз?
- У билан жуда яхши чиқишиб кетдик. Майдонда ва унинг ташқарисида яхши тушунамиз. Кўрдингиз қисқа фурсат ичида жамоага тўлиқ мослашиб кета олди ва иккинчи босқичда энг кўп гол урди. Мен жамоадаги ҳар бир ўйинчи билан яхши муносабатдаман. Азиз Тўхтабоев ва Дониёр Усмонов билан ҳам олдинги чизиқда ўйнаш доим қулай бўлиб келди.

- Келаси йил сизда олий лигада дебют қилиш учун жуда қулай имконият юза келди. Фикримизга қўшиласизми?
- Ҳа. Насиб қилса олий лигада ҳам ўйнай бошлайман. Ҳозир элитада дебют қилишни сабрсизлик билан кутяпман. Ўйлайманки олий лигада ҳам бемалол ўйнаб кета оламан. Ишонч ва имконият берилса бўлгани.

- Мавсум-2015да сизни “Қўқон-1912”да кўрамизми ёки “Нефтчи”дами?
- Тўғриси бу масала ҳозирча аниқ эмас. Ўзимга қолса яна “Қўқон-1912”да қолиб ўйнаган бўлардим. Буни вақт кўрсатади.

Исломбек Рустамбеков суҳбатлашди.

Отабек Ҳайдаров: “Олий лигада ўйнаш иштиёқи кучли”