Чемпионатда пешқадамлик қилаётган клублар кубокда ўзаро баҳс олиб борадилар. Ҳозирга қадар жамоалар Ўзбекистон Кубоги баҳслари доирасида тўқнаш келишмаган. "Пахтакор" ҳам, "Локомотив" ҳам ўз олдига чемпионат ва кубокда муваффақиятли қатнашиш вазифасини қўйган. Шу сабабли беллашувларнинг кескин, шиддатли ва ҳужумкор ўтишини кутиш мумкин.

"Пахтакор" 1/16 финал босқичида "Хоразм"ни 4:0 ҳисобида мағлубиятга учратди. 1/8 финалда "Қўқон-1912" билан ўйинларда меҳмонда 0:0, уйда 4:0 ҳисобидаги натижалар кузатилди. Чорак финалда эса "Оқ-тепа" сафарда 7:1, "Пахтакор" стадионида 5:1 ҳисобида тор-мор келтирилди.

"Локомотив" эса мусобақага чорак финалдан киришиб, "Динамо"ни сафарда 4:3, ўз майдонида 3:0 ҳисобида доғда қолдирди. Жамоалар сафида барча етакчи футболчилар майдонга тушиш имкониятига эга.

"Локомотив" ва "Пахтакор" жамоалари ўртасидаги учрашув 27 июнь, жума куни соат 19:00да ТТЙМИ стадионида бошланади. "Пахтакор" мухлислари соат 17:30дан бошлаб стадион ҳудудида тўпланишади. Буни жамоа ишқибозлари учун келтириб ўтяпмиз.

Баҳсни Рустам Бобомуродов бошчилигидаги ҳакамлар гуруҳи бошқариб боради.

«ЛОКОМОТИВ» - «ПАХТАКОР»

Ҳакамлар: Рустам Бобомуродов (Навоий), Руслан Самандаров (Навоий), Обид Жумаев (Навоий), Марат Исмоилов (Тошкент).

Назоратчи: Гали Имомов (Тошкент).

Ўзбекистон Кубоги. Ярим финал. "Локомотив" - "Пахтакор"