Юзага келган танаффусдан фойдаланиб сайтимиз мухбирлари ПРО-Лига жамоалари футболчилари билан интервьюлар ташкил этишмоқда. Қуйида Урганчнинг "Хоразм" клуби аъзоси Тимур Исмаилов билан ташкил этилган интервьюни эътиборингизга ҳавола этамиз.

- Тимур, "Хоразм" жамоаси жорий мавсумда Ўзбекистон кубоги мусобақасида 1 та ва ПРО-Лиганинг 2 та тур учрашувларини ўтказди. Сизни ушбу ўйинларда майдонга тушмадингиз, бунга сабаб нима?

- Мавсум аввалида ташкил этилган машғулотларда олган жароҳатим туфайли ушбу учрашувларни ўтказиб юборишга мажбур бўлдим. Айни дамда ҳаммаси жойида, навбатдаги учрашувларга тўлиқ тайёрман деб айта оламан.

- Бизга маълум, сиз футболдаги фаолиятингизни ҳимоя чизиғида бошлагансиз. Кейинчалик сизни ҳужумчи сифатида кўрмоқдамиз. Буни қандай изоҳлайсиз?

- Тўғри, дастлаб ҳимоя чизиғида ўйнар эдим. "Хоразм" жамоасининг аввалги мураббийи Александр Ежов мени кўпроқ ҳужумчи ампуласида ўйнатган. Шундан кейин ўзим ҳам ҳужум чизиғига мослашиб кетдим.

- "Хоразм" жамоаси ҳужум чизиғида рақобат қандай?

- Нафақат ҳужумда, балки жамоамизнинг ҳар бир чизиғида рақобат жуда кучли. Шундан келиб чиқиб айтиш мумкинки, ўйинларга тўлиқ тайёр бўлган футболчи майдонга тушади.

- Келажакдаги мақсадларингиз қандай?

- Албатта, келажакда "Хоразм" жамоасининг ғалабаларига ўз ҳиссамни қўшиш, ўйинларимни янада ўстириб, яхши натижалар кўрсатиш каби мақсадларим бор. Шу ўринда жамоамиз мухлисларига бизни мунтазам қўллаб-қувватлаб келаётганликлари учун миннатдорчилик билдираман.

Тимур Ибрагимов ёзиб олди

ПРО Лига. Тимур Исмаилов: "Хоразм" жамоаси мухлисларига миннатдорчилик билдираман