Британия матбуотидаги хабарларга қараганда, парижликлар 21 ёшли франциялик футболчи учун “болғачилар”га 50 млн фунт стерлинг (тахминан 56 млн евро) таклиф қилишяпти. Диопга “Манчестер Юнайтед” клуби ҳам оғиз солган.

“Қизил иблислар” бош мураббийи Жозе Моуриньонинг шахсан ўзи ҳимоячини ўз клуби таркибида кўриш истагини билдирган. Португалиялик мутахассис айнан “Вест Хэм”дан қабул қилиб олинган (1:3) мағлубиятдан сўнг Диопни “монстр” деб атаганди.

Маълумот учун, Исса шу йилнинг июнь ойида “Вест Хэм”га Франциянинг “Тулуза” жамоасидан 22 млн фунт стерлинг (тахминан 24,7 млн евро) эвазига кўчиб ўтган эди. Франциялик ҳимоячи ўшанда Лондон клуби билан 5 йиллик шартнома имзолаганди. Диоп “Вест Хэм” либосида Премьер-лиганинг барча 8та учрашувида майдонга тушган.

ПСЖ “Вест Хэм” ҳимоячисига 50 миллион таклиф қилди