Кеча “Машъал”га қарши кечган назорат учрашувидан сўнг жамоа ҳужумчиси Қадамбой Нурметовнинг фикрларига қулоқ тутдик.

“Албатта, бошида машғулотларга киришиб олиш қийин бўлди. Уй шароитидаги ва жамоавий машғулот ўртасида тафовут катта. Шунга қарамасдан икки баробар кўпроқ тер тўкмоқдамиз. Суперлига бошлангунига қадар оптимал спорт формасига кириб олишга интиламиз. Тачмурод Агамуродов билан яна бир бор бирга ишлаш насиб қилганидан хурсандман. Ўтган мавсум Самарқандда бирга ишлаган эдик, услуб ва талабаларидан хабарим бор. Энди “Динамо” ҳақида гапирадиган бўлсам, ўша пайт бизга вақт етмади, мураббийнинг услубини тушуниб олганимизда кеч бўлганди. Шунда ҳам охиргача элитада қолиш имкониятни сақлаб қола олдик. Ҳозир Тачмурод Шамаковичда ҳам, бизда ҳам вақт етарли. Ўйлаб қўйган режаларимизга босқичма-босқич эришишга ҳаракат қиламиз. Тақвим ҳақида нима дея оламан? Осон бўлмаган ўйинлар кутиб турибди. Агарда ўз ўйинимизни тўғри йўлга қўйиб олсак, олдинда кутиб турган учрашувларда қийналмаймиз. АГМК жамоасини ҳурмат қиламиз ва фақат ғалаба учун майдонга тушамиз”,- дейди иқтидорли ҳужумчи.

Маълумот ўрнида айтиб ўтиш жоизки, ўтган мавсумни Самарқанднинг “Динамо” жамоасида ўтказган Қадамбой Нурметов 25та учрашувда майдонга тушди. Рақиблар дарвозасини эса 5 бор ишғол қилди. Шунингдек ҳакамлар томонидан икки марта сариқ ва бир марта қизил карточкага лойиқ кўрилди.

Қадамбой Нурметов: “Ўз ўйинимизни кўрсата олсак қолган учрашувларда қийналмаймиз”