Kecha “Mashal”ga qarshi kechgan nazorat uchrashuvidan so'ng jamoa hujumchisi Qadamboy Nurmetovning fikrlariga quloq tutdik.

“Albatta, boshida mashg'ulotlarga kirishib olish qiyin bo'ldi. Uy sharoitidagi va jamoaviy mashg'ulot o'rtasida tafovut katta. Shunga qaramasdan ikki barobar ko'proq ter to'kmoqdamiz. Superliga boshlanguniga qadar optimal sport formasiga kirib olishga intilamiz. Tachmurod Agamurodov bilan yana bir bor birga ishlash nasib qilganidan xursandman. O'tgan mavsum Samarqandda birga ishlagan edik, uslub va talabalaridan xabarim bor. Endi “Dinamo” haqida gapiradigan bo'lsam, o'sha payt bizga vaqt etmadi, murabbiyning uslubini tushunib olganimizda kech bo'lgandi. Shunda ham oxirgacha elitada qolish imkoniyatni saqlab qola oldik. Hozir Tachmurod Shamakovichda ham, bizda ham vaqt etarli. O'ylab qo'ygan rejalarimizga bosqichma-bosqich erishishga harakat qilamiz. Taqvim haqida nima deya olaman? Oson bo'lmagan o'yinlar kutib turibdi. Agarda o'z o'yinimizni to'g'ri yo'lga qo'yib olsak, oldinda kutib turgan uchrashuvlarda qiynalmaymiz. AGMK jamoasini hurmat qilamiz va faqat g'alaba uchun maydonga tushamiz”,- deydi iqtidorli hujumchi.

Malumot o'rnida aytib o'tish joizki, o'tgan mavsumni Samarqandning “Dinamo” jamoasida o'tkazgan Qadamboy Nurmetov 25ta uchrashuvda maydonga tushdi. Raqiblar darvozasini esa 5 bor ishg'ol qildi. Shuningdek hakamlar tomonidan ikki marta sariq va bir marta qizil kartochkaga loyiq ko'rildi.

Qadamboy Nurmetov: “O'z o'yinimizni ko'rsata olsak qolgan uchrashuvlarda qiynalmaymiz”