Муросасиз ва курашларга бой ўтган ўйинда вакилларимиз 2:1 ҳисобида ғалаба қозонди. Баҳсдан сўнг миллий жамоамиз мураббийи Нодир Элибоев фикрларини билдириб ўтди.

"Ўйин ҳақида нима дейишим мумкин? Тўғриси кўнглимиз тўлмади. Йигитлар ўзларининг эллик фоиз кучини ҳам кўрсата олмади. Бу нима билан боғлиқлигини кўриб чиқамиз. Тожикистон билан кечадиган ўйинга тайёргарликни давом эттирамиз.

Ҳимояда ҳам, ҳужумда ҳам хатоларимиз кўп бўлди. Футзал ҳам футболда ҳам бўлгани каби хатосиз ўтмайди. Ўз устимизда кўпроқ ишлаймиз.

Марокаш йиғини ҳақида фикр билдирадиган бўлсам рақиб илиқ таассурот қолдирди. Инфратузилмаси, ташкилотчилик борасида ҳам яхши. Терма жамоаси ҳам юқори даражада эканлигини кўрдик. Футзалчилари индивидуал жиҳатдан маҳоратли дея оламан. Чунки аксарият ўйинчилари Франция, Испания каби Европа мамлакатларида тўп тепади. Бу ўйинларда мағлуб бўлган бўлсакда ўзимизга фойдали жиҳатларни олдик. Марокаш тўп даражадаги жамоа, Африка чемпиони, охирги ўйинда Мисрни 5:0 ҳисобида мағлуб этишганди. Нафақат қитъада балки жаҳонда ҳам ўз ўрнига эгадир.

Таркиб борасида изланмоқдамиз. Ҳар бир йиғинда 20 нафар ўйинчиларни йиғиб танлаб оляпмиз. Асосий дарвозабонимиз ҳам йўқ эди бугун. Ўртоқлик ўйинларида ёш футболчиларга имкон бериб уларни текшириб кўряпмиз. Ҳар хил вазият бўлиб қолиши мумкин. Бир ўйинчини ўрнини бошқа ўйинчи тўлдирадиган таркиб шакллантирмоқчимиз",- дейди Нодир Элибоев.

Қирғизистон билан ўйин, Марокаш йиғини, таркибдаги муаммолар - Нодир Элибоев иштирокидаги матбуот анжумани