20 ёшли футболчига "Челси" ва "Манчестер Сити" клублари ҳам қизиқиш билдирмоқда. Унинг "Лейпциг" билан шартномасидаги 110 миллион евролик товон пули 2024 йилнинг ёзида кучга киради.

Журналист Альфредо Педулланинг сўзларига кўра, Гвардиол учун дастлаб “Челси” 80 миллион евро таклиф қилган, кейинроқ “Реал” 90 миллион тўлашга тайёрлигини билдирган.

Аммо бу сумма "РБ Лейпциг"ни қониқтирмади ва сўнгги 15 кун ичида мадридликлар Йошконинг трансфери бўйича икки бор учрашув ўтказди.

"Қаймоқранглилар" футболчи учун 60 миллиондан иккита марта тўлов қилиш эвазига жами 120 миллион еврони, шунингдек, турли бонусларни таклиф қилишди. Қолаверса, "Манчестер Сити" ҳам 100 миллион евродан кўпроқ пул тўлашга тайёрлигини билдирган.

Маошга келсак, "Челси" ҳимоячига йилига 9 миллион евро, "Реал Мадрид" эса 6 миллион евро таклиф қилган, аммо Гвардиол "Реал"га кўпроқ қизиқиш билдиргани учун камроқ маош олишга тайёрлигини айтди.

Кимошди савдосига қарши бўлмаган "РБ Лейпциг" ҳамон энг яхши таклифни кутмоқда.

Гвардиол Хорватия билан ЖЧ-2022'да бронза медалларини қўлга киритди.

Йошко жорий мавсум Бундеслигада 13 та ўйинда майдонга тушди.

“Реал” Гвардиол учун 120 миллион евро таклиф қилди