- Дастлаб ўйин ҳақида фикрингиз?

- "Нефтчи" жамоаси бугун қаҳрамонлик кўрсатиб жуда зич ҳимояланди ва шунинг эвазига зафар қучди. Бизга эса ҳужумда совуққонлик ва вазиятларни голга айлантириш етишмади. Рақиб тўлиқ таркиб билан ўйнаб турганида ҳам, бир ўйинчи кам бўлиб қолганида ҳам ташаббусга эга эдик, аммо омад келмади. Афсуски, натижа биз кутгандек бўлмади, агар ғалаба қозонганимизда турнир жадвалидаги ҳолатни яхшилаб олган бўлардик. Умуман олганда, футболчиларимизга эътироз йўқ, лекин ҳужумчиларимиздан кўпроқ совуққонликни кутгандик. Қолаверса, Зафармурод жарима майдончаси ичида йиқитилганида ўша вазиятга ҳам эътироз билдирдик.

- "Насаф"нинг амалдаги чемпион сифатида нега охирги ўйинларда омади келмаяпти?

- Ўзимиз ҳам шунга ҳайронмиз. Рақиблар бизга қарши анча зич ҳимояланмоқда ва уларнинг ҳимоясини ёриб ўтиш осон бўлмаяпти. Уйда "Андижон" билан ўйнаганимизда ҳам шу ҳолат кузатилганди. Бу албатта ёқимсиз ҳолат, лекин ҳаммаси ўз қўлимизда, мавсум давом этяпти ва буёғига кейинги ўйинларга тайёргарлик кўрамиз.

- Акмал Мозговойнинг кетиши жамоа ярим ҳимоясини сусайтирдими?

- Акмалнинг кетгани тарихга айланиб бўлди. Биз қўл остимиздаги футболчилар билан мақсад сари интилишимиз керак. Менимча, Сардор билан Мурод ярим ҳимояда Акмалнинг йўқлигини билдирмаяпти. Одатда натижа яхши бўлмаса, ҳар хил саволлар туғилади. Футболда шунақа: кимдир жамоадан кетса, бу бошқа бир футболчининг "очилишига" сабаб бўлади. Таркибимизда бўлмаган футболчилар ўрнини ёшлар билан тўлдирамиз. Бугун уч нафар ҳужумчи билан ҳаракат қилганимизга қарамай, ўзимиз хоҳлаган натижага эриша олмадик.

- "Нефтчи"нинг қайси жиҳатларини таъкидлаб ўтган бўлардингиз?

- "Нефтчи" кўпроқ ҳимоядан ўйинни қуради. Бугун ҳам шундай бўлди. Улар бир киши кам бўлиб қолгач, ҳимояга янада кўпроқ эътибор қаратди ва ҳужумда бир нафар ўйинчини қолдириб бошқалар асосан ҳимояланиш билан вақтни ўтказди. Бу эса жамоага натижа олиб келди.

Рўзиқул Бердиев: "Афсуски, натижа биз кутгандек бўлмади"