- Ўйин жанговар ўтди, майдонда ҳақиқий жанг бўлди. Иккала жамоа ҳам ғалаба учун майдонга тушгани кўриниб турганди. ОКМК ҳам, биз ҳам ғалаба учун лойиқ ўйин кўрсатдик. Бизда ҳам кўплаб вазиятлар бўлди. Бугун иккала ўйин ҳам дуранг билан якунланди ва биз учун омадли бўлди. Ўйлайманки, "Насаф" кумуш медалларга лойиқ эди. Қийин бўлишини билсак-да, бугун биз натижа учун ўйнадик. Бугун жамоаларда енгиллик кўринмаган бўлса-да, жанговар ўйинни кўрсатиб бера олишди.
- "Насаф" бугун тўлиқ асосий таркибини ўйнатмади. Сиз кўплаб футболчиларни ОЧЛ ўйини учун олиб қўйдингизми ёки ОЧЛ плей-оффи учун медалларни қурбон қилишга тайёрмидингиз?
- Кўп ўйин ўтказдик, шу сабабли доимо кейинги ўйинни ҳам ҳисобга оламиз. Таркибда доимо ротация бўлиб туради, асосан марказий ҳимояда ва ҳужум чизиғида футболчиларга дам бериб турамиз. Чунки ушбу позицияда бизда ротация учун имкониятларимиз бор. Олдинги ўйинда бошқалар ўйнаганди, шу сабабли бугунги учрашувга бошқа футболчиларни жалб қилдик. Биласиз, 3 кундан кейин оғир ўйин ўтказамиз ва буни ҳам ўйлагандик.
- Олдинги матбуот анжуманларидан бирида Сиз ушбу мавсум "Насаф" учун омадли ўтаётганини айтгандингиз. Шу фикрингизда қоласизми? "Насаф" Сизнинг қўл остингиздаги энг яхши мавсумини ўтказдими?
- Албатта. Вице-чемпионлик ва иккита кубокни қўлга киритиш - биз учун тарихда бўлмаган ҳолат. Буни такрорлаш ҳам жуда қийин. Шу сабабли ҳеч шубҳаланмасдан ушбу мавсум "Насаф" учун энг омадлиси бўлди дея оламан.
- Ўтган мавсум "Насаф" сўнгги турда чемпионликни бой берганди. Ушбу мавсумда "Насаф"га чемпионлик учун нима етишмади деб ўйлайсиз?
- Бунга бир қанча сабаблар бор. Айниқса, керакли футболчиларнинг жамоадан кетгани, легионерлар трансфери омадсиз бўлганини келтириш мумкин. Барқарорлик, маҳорат етишмади. Барчасини кўриб чиқамиз.
- "Насаф"га ушбу мавсумда 5 баллик тизимда неча баҳо қўясиз?
- Беш баҳо қўяман.
Изоҳлар