"Бугун жуда қийин ғалаба эришдик. Ғалаба билан мухлисларни табриклайман. Барча ўйинлар жуда қийин кечмоқда. Асосийси, пешқадамликни сақлаб қола олдик. Ўйинга келадиган бўлсак, бугун икки хил бўлимларни гувоҳи бўлдик. Биринчи таймда кўпроқ ҳужумда ўйнадик. Иккинчи бўлимда эса асосан натижа учун ҳаракат қилдик. "Локомотив" кўп бор позицион ҳужумда ҳаракат қилди", - дея ўйин ҳақидаги фикрлари билан ўртоқлашди Рўзиқул Бердиев.

- "Насаф" бугун жуда кўплаб вазиятларга эга бўлди. Бироқ яна ўша муаммо, имкониятлардан фойдаланишда камчиликлар етарлича. Давралар оралиғида янги ҳужумчи сотиб олиш режалаштирилганми?
- Тўғри, вазиятларни голда айлантиришда муаммоларга дуч келмоқдамиз. Балки иккинчи бўлимда юзага келган вазиятлардан бирини голга айлантирганимизда, ўйиннинг қолган қисми осонроқ кечармиди. Сўнгги пайтларда барча "Насаф"нинг ҳужум чизиғини ва хусусан Илҳом Шомуродовни танқид қилмоқда. Лекин шуни унутмаслик керакки, Шомуродов ҳар доим жамоамизнинг керакли ва муҳим голларини киритиб келган. Унинг ўйини мураббийлар штабини қониқтирмоқда. Бизда ҳар бир вазиятдан унумли фойдалана оладиган ҳужумчини сотиб олиш учун шароитларимиз тўғри келмайди. Биз ҳам истардик, юқори савиядаги ҳужумчини сотиб олишни. Бироқ бунга имкониятларимиз етарли эмас. Шароитдан келиб чиққан ҳолда иш тутамиз. Давралар оралиғида қайсидир футболчини сотиб оламиз деб ваъда бера олмайман.

Рўзиқул Бердиев: "Қийин ғалабани қўлга киритдик"