-Аввало бугун майдонла ҳаракат қилган ҳар иккала жамоа футболчиларига раҳмат. Бундай иссиқ об-ҳавода футбол ўйнаш жуда оғир. Бугун тез футбол бўлмагандиру, лекин ҳар иккала жамоа мазмунли ўйин кўрсатди. Қисқаси, таблодаги ҳисоб ўйинга мос бўлди.

-Биринчи давра якунланди. Мураббий сифатида нималарни режа қилгандизу, нималарга эришолмадиз?

-Режамиз бўйича ҳар бир ўйинда керакли натижаларга эришиш эди. Лекин шунақа ўйинлар бўлдики, биз ўз қўлимиз билан очколарни рақибга бериб қўйдик. Шу сабабдан биринчи даврани тўртинчи поғонада якунладик. Лекин ўйлайманки, ҳали ҳаммаси олдинда. Олдимизда иккинчи давра ўйинлари турибди.

-Давралар оралиғида жамоанинг қайси чизиқлари кучайтирилади? Хорижда ўқув-йиғин машғулотлари ўтказиладими?

-Хорижда йиғин ўтказсак яхши бўларди. Лекин жамоамизнинг молиявий имконияти ҳозирча бунга етмайди. Ўз қароргоҳимизда иккинчи даврага ҳозирлик кўрамиз. Агар бизнинг ўйинимизни кучайтирадиган ҳужумчи бўлса, таркибга жалб этамиз. Бу йўлда иш олиб борилмоқда. Бу биз учун жуда муҳим. Мавсум бошида барча ўйинни Шомуродов ўтказиб келмоқда. У ҳам инсон, уям чарчайди. Шу сабаб унга ёрдам берадиган, рақобатни кучайтирадиган ҳужумчи керак. Кенжа билан Алланизовнинг формасига қайтиши анча чўзилиб бораяпти.

-Артурнинг ўйинида пасайиш кузатилмоқда...

-Бу ҳақиқатан кўриниб турибди. Биласиз, Артур жамоамизнинг етакчи, энг муҳим ўйинчиси ҳисобланади. Мавсум бошидан буён у барча ўйинларда иштирок этаяпти ва бу ўз таъсирини ўтказмай қолмаяпти. Кейин руҳий томонлама ҳам жамоамизда муаммолар кузатилди. Эътибор берган бўлсангиз, ОЧЛдан гуруҳ босқичидан ўта олмагач, жамоамизга бу салбий таъсир кўрсатди, чамамда. Ўйинимизда иштиёқ, ҳоҳиш камайди. Ўйлайманки, биринчи даврадан кейин футболчиларга дам берамиз. 16 июлдан иккинчи даврага ҳозирлик кўрамиз. Ўйлайманки, иккинчи даврада у ўзига билдирилган ишончни оқлайди.

-Ҳамза Каримов иккинчи ўйинга учрашув қайдномасидан ўрин олмаяпти...

-Ҳамзада кичик жароҳат бор. Шу сабаб у жамоамизга ёрдам бера олмаяпти. Аммо Ўзбекистон кубогининг чорак финали жавоб учрашувида у жамоамизга ёрдам бериши мумкин.

Рўзиқул Бердиев: “Таблодаги ҳисоб ўйинга мос бўлди”