Ижодий гуруҳга иккита савол билан мурожаат қилдик:

1. "Классико"дан нималарни кутяпсиз?
2. Бугунги ўйин қандай натижа билан ниҳоясига етади деб ўйлайсиз ва нима учун?

Камолиддин Алимов

1. "Классико" ўз номи билан "Классико". Бундай мақомдаги ўйинлардан шиддат, тезкорлик, шедевр голларни... хуллас, футболга оид санъат намуналарини кутиш мумкин. Соат тунги 01.00да бошланадиган ўйинни кутган вақтингизга асло ачинмайсиз.

Клублар тўқнашуви ўз йўлига. Месси - Роналду қарама-қаршилиги ҳам футбол ишқибозларининг диққат марказида бўлади. Таъбир жоиз бўлса, бугун дунё футболи мухлислари иккига ажралишади. Бу галги "Эл Классико" ҳам кўп жиҳати билан биринчи навбатда жамоаларнинг ўзлари учун аҳамиятли бўлади. Агар бугун "Реал" ғалаба қозонса, икки асосий рақибининг биридан 7 очкога ўзиб кетади.

Мабодо, мағлубиятга учраса, ўртадаги тафовут бир очкогача қисқаради. Айнан шу ҳолат ўйинга бўлган қизиқишни янада оширади.

2. Биринчи саволдаги фикримнинг мантиқий давоми сифатида бугунги оқшомдан ўрин олган ўйин "Барселона"га олти очко учун кечади, деган бўлардим. Бундай ўйинларда башоратлар ўзини унчалик оқламайди. Бир қарасангиз "Классико"га хос бўлмаган йирик ҳисоб қайд этилади, баъзан дарвозалар дахлсиз қолади. Лекин бугун йирик ҳисоб қайд этилмаса керак.

Юлдузлар ижросидаги голлар ёмғирини кўрмаймиз, чоғи. Бу менинг шахсий фикрим. Иккала жамоа ҳам бугунги ўйинга юқори кайфиятда етиб келди. Айниқса, "Барса" футболчиларининг Премьеродаги йирик ғалаба ва Чемпионлар Лигасидаги "Сити" устидан қозонилган муваффақиятдан сўнг кайфиятлари аъло даражада. "Реал" ҳам бу икки мусобақада зафар қучди.

Аммо, "Реал"дан бироз фарқли равишда Херардо Мартино шогирдлари жорий мавсумда бир текис ўйин намойиш этишмаяпти. Аутсайдерлар билан бўлган учрашувларда мағлубиятга учраб, қимматли очколарни бой бериб қўйишди. Мени "Барселона"нинг мухлиси сифатида айнан шу нарса бироз ҳавотирга соляпти.

"Реал"нинг эса бу борадаги ишлари жойида. Карло Анчелотти ўз ишини бир текис давом эттиряпти. Лекин "Эл Классико"да ҳаммаси нарса бўлиши мумкин. Шундай экан, тунги 01.00 ни интизорлик билан кутамиз.

"СА" "Классико" олдидан. Камолиддин Алимов: "Бугун голлар ёмғирини кўрмаймиз"