Самвел Бабаян: "Бугунги ўйин биз учун жуда муҳим эди. Йигитларга катта раҳмат айтаман, мухлисларни ғалаба билан табриклайман".

- "Навбаҳор" аввалги ўйинларга нисбатан тамомила бошқа жамоадек кўринди. Яъни биринчи ва иккинчи голлардан кейин тўхтагани йўқ. Аввалги баҳсларда бу шижоатни кўрмаган эдик.

- Биринчи навбатда йигитлар ўзини жуда яхши кўрсатишди. "Бунёдкор" яратган бир-икки вазиятни ҳисобга олмасак ўйинни тўлиқ назорат қилдик. Бу "Навбаҳор"нинг жорий мавсумдаги ҳозирча энг яхши ўйини. Асосийси - жамоа голдан кейин ҳам тўхтаб қолмади ва вазиятлар яратишда давом этди. Таҳлилларимизнинг фойдаси бўлди.

- Биринчи бўлимни олиб қарасак, ҳар бир чизиқдаги футболчилар ўз вазифасини тўлиқ адо этишди. Бу жамоа асосий таркиби шаклланиб улгурганидан далолатми ёки бугун шунақа бўлиб қолдими?

- Мавсум олдидан жамоани 10 киши тарк этди ва яна шунча футболчи "Навбаҳор" сафига келиб қўшилди. Буни жиддий ўзгариш деб биламан. Расмий ўйинлар ўзгаришларнинг ҳақиқий фойдасини кўрсатади. Бугун айниқса биринчи бўлимда ҳамма нарса ишлади. Нима бўлди? Йигитлар ушбу ўйин муҳимлигини тушунишди деб ўйлайман. "Бунёдкор"га қарши баҳсдаги ғалаба бизни биринчи ўринга олиб чиқарди. Руҳий жиҳатдан бу биз учун жуда муҳим эди. Яна, таҳлилларимиздаги хулосалар орқали хатоларимизни тўғирладик.

- Остон Ўруновни нега алмаштирдингиз?

- Аввалги ўйинда Остон жароҳат олганди, шу сабаб бугун уни асрашга қарор қилдим.

Самвел Бабаян: "Бу "Навбаҳор"нинг жорий мавсумдаги ҳозирча энг яхши ўйини"