Ҳар йили ёзда "Ювентус"ни қайсидир муҳим ва етакчи футболчи тарк этиши эса одат тусига айланмоқда.

Тўғри, ҳали Леонардо Бонусси расман "Милан"га ўтгани ҳақида эълон (мақола ёзилаётганида расман эълон қилинмаганди) қилинмади. Аммо ҳозирда футболчи Миланда ва тез орада ўзининг янги жамоаси билан шартнома имзолаши кутилмоқда.

Ўтган йили Европа чемпионатидан кейин Бонуччининг "скуадра адзурра" таркибидаги ажойиб ўйини юксак эътирофларга сабаб бўлиб, унга бир қатор гранд жамоалар қизиқиш билдиришганди. Конте Леони "Челси"га чорлар, Пеп "Сити"да Бонуччини кўргиси келарди.
Бу йили ёзда ҳам бу каби қизиқишлар кучайди. Леони яна бир Леоси бор "Барселона" ҳам ўз сафига кўришни истади. Йўқ, Бонуччи Ла Лигани ҳам, АПЛни ҳам танламади. Шунда "Ювентус" мухлислари Бонуччининг жамоага содиқлигига, садоқатига яна бир карра ишонишаётганди.
Бонуччи ўз интервьюларида "Юве"нинг либоси унинг танасига мослаб тикилгани ҳақида айтиб, мен оқ-қора йўл-йўл либосдан нафас оламан, деганини бугун миллионлаб тифозилар эслашмоқда.
Бу ҳақида ҳазиллар (тролль) қилиб, Леони оқ-қора рангларни қизил-қорага адаштириб қўйгани ҳақида латифалар ҳам чиқиб кетди.
Ҳаммаси жуда тез содир бўлди. Бонуччи барчани шок ҳолатига келтириб, АПЛ ёки Ла Лигага эмас, чўкиб кетаётган "Милан"ни танлагани барчани бирдек ажаблантирмоқда.

Нега "Милан"ни танлади?
"Ювентус"да қаторасига олти марта скудетто олди. Кетма-кет уч йил олтин дубль қайд этилди. Гарчи ЕЧЛни қўлга киритмаган бўлсада, икки маротаба финалда ўйнади. Европа чемпионлар лигаси устувор бўлганида, Лео Европа лигасида қатнашадиган "Милан"ни эмас, камида "Челси" ёки "Сити"ни танлаши керак эди. Устига-устак "Барселона"дан таклиф бўлганди.
Демак Леони қарори халқаро майдондаги совринга боғлиқ бўлмади.
Италияда скудеттони ютиб чарчаган Бонуччини "Милан"ни нимаси ўзига ром этди?
Балки Лео ёшлигидан "Милан"нинг ашаддий ишқибози бўлган дерсиз. Ишониш қийин. Чунки Лео ҳар интервьюсида қалбан "ювентини" эканлигини такрорлашдан чарчамаган.

Бонуччининг "Милан"га ўтиши борасидаги ҳақиқатни фақатгина футболчининг ўзи билади.
Лекин бу трансферни амалга ошишига энг асосий сабаб - бу пуллар эмас, катта пуллар эканлиги кундек равшан.
Айтишадику, пул билан битмайдиган муаммони катта пул билан битказса бўлади, деб.
Леони оладиган маоши у қадар катта эмас, бор-йўғи 6 миллион еврони ташкил этиши таъкидланмоқда. Англия жамоалари бу маошдан ҳам кўпроқ пул ваъда қилишганди. Демак гап айнан маошга боғлиқ эмас. Шунчаки Леонардо Бонуччининг "Милан" билан шартнома тузиши учун ҳимоячига бонус сифатида, янада ўзбекчароқ айтадиган бўлсак, кўтарма пулининг жуда катта миқдори асосий сабаб бўлаётгани аниқ.

Акс ҳолда Лео ҳеч ким кутмаган пайтда "Ювентус"дан инқироз кўчасидан чиқишга ҳаракат қилаётган "Милан"га ўтишни ўйламасди. Бу аввалдан пишитиб қўйилган "ош".

Афсонавий Алекс дель Пьеро ҳам бекорга бу трансферга ўз муносабатини билдирмади. Жуда кам гапирадиган ва гапираётганда ҳам билиб сўзлайдиган Пьеро буни аввалига ҳазилга ўхшатди. Алекс ҳақ, ҳеч ким ўйламаган трансфер руй берди.
Кьеллининг опаси эса бекорга ғалабанинг калити пул, дея изоҳ қолдирмади.
Кьеллинининг опаси: "Лео доим "Ювентус" сардори бўлишни истаётгани ҳақида гапирарди. Энди эса "Милан"да бемалол сардор бўла олади".

Унинг бу ўтиши қанчалик шов-шувли ва кутилмаган бўлсада, Италия А Серияси учун жуда фойдали бўлиш эҳтимоли ҳам бор.
Биринчи навбатда бу трансфердан "Милан" ютди.
Трансферларга катта урғу қаратаётган ва кўпчиликни ўз сафига қўшиб олаётган "Милан" учун Леони келиши фойдадан ҳоли бўлмаслиги аниқ.
"Милан"нинг кучайиши эса Италия чемпионатининг хизматига ишлайди. Бу тарафлама Леони "Милан"га ўтаётгани қувонарли.
Ўз вақтида "Милан" афсонаси сифатида гавдаланган Пирло ҳам "Ювентус"ни танлаган ва янги қурилаётган "Юве"да муҳим ролни бажарганди.
"Юве"нинг гегемонлиги айнан Пирлонинг келишидан кейин бошланган.
Энди "Ювентус" Бонуччи орқали "Милан"га "қарз"ини узаётган бўлса ажаб эмас.
Фақат бу икки трансферлар ўртасида фарқ бор. "Милан" ўз вақтида Пирлони эрта ҳисобдан чиқариб, унга чиқиш эшикларини кўрсатганди. Бонуччи эса "Ювентус"дан ўз хоҳиши билан рақобатчи ҳамда принципиаль рақибга йўл олмоқда.

Ўтган мавсумнин сўнгги қисмида Бонуччи ва Аллегри ўртасидаги келишмовчиликлар, "Порту" билан ўйин олдидан Леони жаримага тортилгани. ЕЧЛ финали танаффус вақтида Дибала билан айтишиб қолгани ва хаттоки тортишув муштлашувгача боргани ҳам Бонуччининг кетишига замин яратган бўлиши мумкин. Ёки аксинча, Лео ўшанда кетишга тараддуд кўриш мақсадида тортишувларга сабабчи бўлгандир. Бунисини эса фақатгина Бонуччининг ўзи билади. Дани Алвеш ҳам жамоадаги ички муҳит сабабли кетганини маълум қилганди. "Ювентус"да тартиб интизом ва ички муҳит ҳар доим барчасидан устун турган. Дани Алвешга рақсга тушишига рухсат берилмагани ва Бонуччи айнан кийиниш хонасидаги можаролари сабабли клубдагиларни уни сотиб юборишга "мажбур" қилган бўлиши мумкин.

Айни пайтда эса "Ювентус"нинг кўплаб ишқибозлари 2012 йили "Милан" ва ўтган йили "Наполи" тифозилар тушган ҳолатни ҳис этишмоқда.

Эн қизиғи, "Ювентус"ни ҳар мавсум якунида бир қатор етакчилар ва юлдузлар тарк этиши янгилик бўлмай қолди.

Аввалига Конте, Видаль, Тевез, кейинчалик Погба ва энди Леонардо Бонуччи.
Ўтган йили Погба "Ювентус"дан кетади, деган хабарлар чиққанида ҳам кўпчилик буни шунчаки миш-миш сифатида қабул қилганди. Бу йили эса Лео кетмоқда.

Янада қизиқ жиҳати, бугун 15 июль, аниқроғи, "Ювентус"нинг янги мавсум учун чиқарган мавсумий абонементлари сотуви тугатиладиган кун. Энди мухлислар ўз норозичиликлари билан мавсумий абонементларни қайтариб бера олишмайди.
Конте, Тевез, Видаль, Погба ва Бонуччининг кетиши эса айнан мавсумий абонементлар сотуви тугатиладиган кундан кейин расман эълон қилинмоқда.
Бу шунчаки тасодифми? Йўқ, бундай деб бўлмайди.

Ҳақиқат шуки, Бонуччининг кетиши билан "Ювентус"нинг ҳимоя чизиғи кучсизланиб қолмайди. "Юве"да ҳимоячилар танқислиги йўқ.. Кейинги йили январда "Ювентус" узоқни кўзлаб сотиб олиб қўйган марказий ҳимоячиси - Кальдара расман жамоага қайтади. Ругани ва Бенатия каби Аллегрида Бонуччининг ўрнини тўлдирадиган ҳимоячилар бор.
"Милан" эса Бонуччи билан яхшигина кучайиб олади. Нафақат ҳимоя чизиғи, Лео орқали жамоадаги муҳит ва ғолиблик руҳи анча кўтарилади.

Кишини ўйлантираётган жиҳат шуки, "Ювентус" ҳар йили ёзда бу каби йўқотишлар давомийлигини тўхтатмаётгани. Топ клуб дея эътироф этиладиган жамоага ҳар йили катта футболчиларини сотиб юбориши ёки қўлдан чиқариши бу салкам фожеага тенг. Бу эса "Ювентус" мухлисларининг катта норозичиликларига сабаб бўлади.

Энди ҳар бир "бяньконери" келаси мавсум Дибала жамоада қоладими, деган ўй билан юради шекилли.

Ушбу трансфердан сўнг "Милан" Бонуччи билан бойиган бўлса, Лео қоп-қоп пуллар билан бойиди...
"Ювентус" эса ҳечам камбағаллашиб қолгани йўқ. Аксинча, ички муҳитга ёмон тарафлама таъсир ўтказаётган футболчисини ушлаб қолишни истамади. Лео бунга мавсум давомида чиройли "ишора" қилди ва клуб раҳбарияти эса буни ўз вақтида пайқади.

Футбол эса айнан шу каби шов-шувли ва кутилмаган трансферлари билан ҳам қизиқ.

Шаҳбоз БЕҒАМОВ

Шаҳбоз Беғамов мақоласи: "Милан" Лео билан, Бонуччи қоп-қоп пуллар билан бойиди. "Юве" эса...