Қийинчилик биринчи навбатда молиявий муаммоларга бориб тақалади. Аввало раҳбарият ўтган йилги қарзлардан батамом қутулгани йўқ.
Қолаверса, жамоада дарвозабонлар билан ишлайдиган мураббий йўқлиги учун молдовалик посбон Александр Меленчук дарвозани қўриқлаш билан бирга бошқа шерикларини ҳам шуғуллантиряпти.

“Сўғдиёна” мураббийлар штабида Даврон Файзиевга акаси Диёр Файзиев билан катта мураббий Руслан Аҳмедов ёрдам бериб келаётгани маълум. Жамоада ҳатто жисмоний тайёргарлик бўйича мураббий ҳам йўқ экан.

Биринчи навбатда клуб раҳбарияти ва мутасаддилар автобус масаласини ҳал қилиб бермаса бўлмайди. Чунки яқинда атиги икки кунга Тошкентга келиб кетган жамоа автобус масаласини зўрға ҳал этди.

Аввалига биз суратдаги автобусни кўриб, “Сўғдиёна” ҳам ўз автоуловига эга бўлибди-да дея хурсанд бўлгандик. Аммо кейин маълум бўлишича, ушбу автобус шаҳар ичида йўналишли қатнайдиган транспорт воситаси бўлиб, клуб уни 1 миллион сўм эвазига ижарага олибди.

Шу ойнинг охирида жиззахликлар ўртоқлик ўйинларида иштирок этиш учун яна пойтахтга келишади. Хўш, “Сўғдиёна” раҳбарияти транспорт масаласини қандай ҳал этади? Жамоа яна шу автобусни ижарага оладими ёки ҳомийлар бошқа бирорта йўлни ўйлаб топишадими? Буни шу ҳафта охирларида билиб оламиз.

Хайрулла Холиқов.

«Сўғдиёна»га дарҳол автобус керак