Бу дастлабки хулосаларга сабаб бўлиши мумкин. Ҳозирча кучли учликни Тошкент клублари якунлаб турибди. Яъни, улар ўз тажрибасидан келиб чиқиб, мавсумни бир текис ўтказишга ҳаракат қиляпти.

Бироқ бу ҳали ҳаммаси эмас. Суперлиганинг аввалги мавсумлардан фарқи шундаки, бунда жамоалар марказий ўйинларда ўзини кўрсатиши керак. Яъни, нисбатан кучсизроқ клублар ва уларнинг натижаси чемпионлик пойгасига ўз таъсирини ўтказа олмайди.

Чемпионлик йўлида

Агар чемпионатни тенг иккига бўлиб ўргансак, “Навбаҳор” ўз-ўзидан пешқадамга айланиб олади. “Пахтакор”дан қабул қилиб олинган мағлубиятни айтмаса, Мўминжонов жамоаси марказий ўйинларда енгилмади. Бироқ иккинчи давра осон бўлмаслигини айтиш керак. Зеро наманганликлар “Локомотив” ва “Бунёдкор” майдонида меҳмон бўлади.

Ўз навбатида “Пахтакор”да имконият яхшироқ эканини ҳам унутмаслик керак. “Навбаҳор”ни айтмаса, кучли олтиликнинг қолган жамоаларини Арвеладзе шогирдлари ўз майдонида қарши олади.

Жон сақлаш йўлида

Қуйи олтиликда ҳам рақобат анча жиддий. “Сўғдиёна” Сергей Лушчаннинг ташрифидан кейин қаддини бироз бўлса-да тиклаб олди. АГМК эса кутилганидан ёмонроқ ўйнаяпти. Бунда улар учун тақвим ҳам бироз ноқулай келганини унутмаслик керак. Зеро АГМК дастлабки тўрт турда фақат кучли олтилик клубларига қарши кураш олиб боришга мажбур бўлган.

Олдинда яна 11 та тур ўйинлари бор. Демак, хатолардан хулоса чиқариб, очколар ишлаб олиш учун ҳаммада имконият бор. 22-турдан кейин мана шу бўлиниш ўзгармайди. Ҳозирча эса назарий жиҳатдан ҳатто “Нефтчи”да ҳам кучли олтиликка кириб олиш учун имконият мавжуд. Демак, олға юришда давом этамиз.

Суперлига 1-даврасини “Навбаҳор” пешқадам сифатида якунлади