Айнан шу савол билан барча жамоа вакилларига мурожаат қилдик ва қуйидаги жавобларни олдик.

Амалдаги чемпион ва кубок соҳиби "Локомотив"нинг олдига шубҳасиз чемпионлик ва кубокни ўзида сақлаб қолиш вазифаси қўйилган. Улар янги мавсумда Суперлигада ҳам чемпион бўлишни мақсад қилишган.

"Пахтакор" жамоаси олдига ҳам чемпион бўлиш вазифаси қўйилган. Жамоа Суперлигада фақат ва фақат чемпионлик учун курашади.

"Нефтчи" матбуот хизмати билан боғланганимизда, клуб раҳбарияти жорий мавсумда жамоа олдига чемпионликни мақсад қилиб қўйганини алоҳида таъкидлади. "Нефтчи" сўнгги 4-5 йиллар ичида йўқотилган имижини тиклаш мақсадида янги мавсумда катта маррани кўзлаётгани айтилди. Шу боисдан жамоа ўз олдига энг максимал вазифани белгилаб олгани маълум қилинди.

"Бунёдкор" олдига аниқ вазифа қўйилмаган. Аммо "қалдирғочлар" ҳар қандай ҳолатда доим олий мақсадлар сари кураш олиб боришларини жамоа бош мураббийи Миржалол Қосимов алоҳида таъкидлади. "Бунёдкор" ҳужумкор, мухлисларга ёқадиган тажовузкор футбол намойиш этишни мақсад қилган. "Қалдирғочлар"нинг асосий мақсади мухлисларни стадионга қайтариш. Ва албатта совринли ўринлар, яъни ОЧЛга йўлланма берувчи поғоналардан бирини эгаллашни жамоа мақсад қилган. Шунингдек, жамоа келажакдаги пойдеворни мустаҳкамлаш учун кўпроқ ёшларга эътибор қаратишни режалаштирган.

"Насаф" олдига аниқ вазифа қўйилмаган. Лекин "аждарлар" бош мураббийи Рўзиқул Бердиев жамоа доим юқори ўринлар, яъни совриндор бўлиш учун кураш олиб боришини маълум қилди. Шунингдек, жамоа жорий мавсумда таркибдаги ёшларга кўпроқ эътибор қаратишни ўз олдига мақсад қилиб қўйгани таъкидланди.

"Қўқон-1912" жамоаси бош мураббийи Нўъмон Ҳасанов Суперлигада чемпионлик учун кураш олиб боришларини эълон қилди. Жамоа фалсафаси - ҳар бир ўйинда фақат ғалаба қозониш.

"Навбаҳор" жамоаси раҳбарияти Суперлигада "лочинлар" чемпионлик учун кураш олиб боришини эълон қилишди.

"Бухоро" жамоаси эса янги мавсумда рақобатбардош жамоага айланмоқчи. Улуғбек Бақоев Суперлигадаги ҳар бир учрашувга фақат ғалаба учун курашишни мақсад қилган.

"Металлург" жамоаси олдига аниқ вазифа белгиланмаган. Янги қурилаётган жамоа имкон қадар яхши футбол кўрсатган ҳолда кучли-олтиликка киришга уриниб кўрмоқчи.

АГМК клуби Суперлигада совринли ўринлар учун курашишни мақсад қилган. Виктор Кумиков бошчилигидаги жамоа юқори тўртталикдаги жамоаларга муносиб рақобат туғдиришга уриниб кўради.

"Қизилқум" эса янги мавсумда кучли-олтиликка киришни ўз олдига вазифа қилиб белгилаганини жамоа бош мураббийи Ҳамид Актамов маълум қилди.

Жиззахнинг "Сўғдиёна" жамоаси эса Суперлигада 6-ўринни эгаллаш учун курашмоқчи.

Демак қуйида Суперлига жамоалари олдига қандай вазифа ва мақсад қўйгани билан танишиб чиқишингиз мумкин:

"Локомотив" - Чемпионлик
"Бунёдкор" - Совринли ўринлар
"Пахтакор" - Чемпионлик
"Насаф" - Совринли ўринлар
"Навбаҳор" - Чемпионлик
"Нефтчи" - Чемпионлик
"Қўқон-1912" - Чемпионлик
"Бухоро" - Рақобатбардош жамоа шакллантириш
"Қизилқум" - Кучли-олтилик
"Сўғдиёна" - 6-ўрин учун курашади
"Металлург" - Вазифа йўқ. Мақсад кучли-олтиликка кириш
АГМК - Совринли ўринлар учун курашади

Суперлига: Тошкент ва водий жамоалари чемпионлик учун курашади