Бугунги баҳсда аввалги ўйинга нисбатан яхшироқ ҳаракат қила олдик. Биринчи ўйиндаги ҳаяжонни енгиб ўта олдик ва ғалабага эришдик - дея гап бошлади Сергей Арсланов.

- "Андижон"нинг ўйинини ўрганиб, уларнинг кучсиз нуқталарини ўргандингизми?

- Замонавий футболда рақибни таҳлил қилмасдан майдонга чиқиб бўлмайди. Мураббийлар штаби, бутун жамоа катта кўламдаги меҳнатни амалга оширди ва бу ғалабага сабаб бўлди.

- Кейинги баҳсдан нималарни кутяпсиз?

- Одамлар бизни "қора тулпор"дек кўришган ва бир томондан бу биз учун яхши. Шунга яраша ўзига хос сюрпризлар амалга ошира оламиз. Кейинги баҳс олдидан руҳий ҳолатимиз жуда яхши ва бу муҳим жиҳат. Шундай экан навбатдаги учрашувда янада қизиқроқ ўйин кўрсатишга ҳаракат қиламиз.

- "Сурхон" ҳужум чизиғида муаммолар юз берди, бу ҳақида нималар дея оласиз?

- Бизда муаммолар бор демаган бўлардим. Таркиб яхши йиғилган, шунчаки уларга тажриба керак. Тўғри, ҳужумни якунлашда баъзи хатолар бўлиб турибди. Футболчиларга раҳмат айтмоқчиман, улар катта муваффақиятга эришишди. Рақиб ҳам кучли ўйин намойиш этди, бир киши кам бўлиб қолганига қарамасдан муносиб ўйин тақдим қилди.

"Сурхон" устози: "Замонавий футболда рақибни таҳлил қилмасдан майдонга чиқиб бўлмайди"