Бугун Ўзбекистон терма жамоасида ўйин ўтказиш бўйича 10-ўринда турган ярим ҳимоячи Виктор Карпенко ҳақида маълумот берамиз. Айни пайтда “Локомотив” клубида фаолият олиб бораётган ҳамюртимиз 60 марта миллий терма жамоа сафида майдонга тушган.

Карпенко 60 учрашувнинг 18тасида тўлиқ ўйнаган. 32 марта асосий таркибда майдонга тушган ҳамда учрашув давомида алмаштирилган. Қолган 10та баҳсда мураббий томонидан захирадан майдонга туширилган. Виктор Карпенко миллий терма жамоа сафида жами 3951 дақиқа ҳаракат қилган.

Илк ўйини, голи ва сариқ карточкаси

Карпенко терма жамоадаги ўз дебютини 2003 йилнинг 4 февралида Белоруссияга қарши ўртоқлик учрашувида ўтказган. Уни терма жамоага Равшан Ҳайдаров жалб этган. Ўша куни ярим ҳимоячи асосий таркибда майдонга тушган 74 дақиқа ўйнаган. Минксда бўлиб ўтган баҳсда дуранг қайд этилган – 2:2.

У терма жамоа сафидаги 60 учрашувда 1 марта огоҳлантириш олган. Карпенко ўзининг илк ва ягона сариқ карточкасини 2009 йилда ЖЧ-2010 саралашида Баҳрайнга қарши ўйинда олган.

Виктор Карпенко Ўзбекистон терма жамоаси сафида 4та гол урган.

Иштирок этган мусобақалари

Қаҳрамонимиз Осиё Кубоги-2007 ва 2011 саралаши ва финал босқичиларида иштирок этган. Бундан ташқари Карпенко ЖЧ-2006, 2010 ва 2014 саралашларида ҳам майдонга тушган.
Осиё Кубоги-2007да Ўзбекистон гуруҳда Малайзияни (5:0), Хитойни (3:0) мағлуб этган, Эронга таслим бўлган (1:2). Чорак финалда Саудия Арабистонига ютқазиб қўйиб (1:2 )мусобақани тарк этган. Карпенко учта ўйинда майдонга тушганди.

Қатардаги Осиё Кубогида Карпенко Қатар ва Қувайтга қарши ўйинларда тўлиқ ўйнаганди. Хитой, Австралия ва Жанубий Кореяга қарши баҳсларда бошқа футболчиларга алмаштирилган эди.

Рақиб терма жамоалар

У футболчи сифатида 30та давлат терма жамоаларига қарши майдонга тушган. Энг кўп Баҳрайнга қарши ўйнаган – 7 марта. Кейинги ўринда Саудия Арабистони ўрин олган - 5та ўйин.

Сариқ карточкаси

Юқорида айтиб ўтганимиздек Карпенко терма жамоа сафида атига бир бор сариқ карточка билан жазоланган. Футболчи бу огоҳлантиришни ЖЧ-2010 саралаши доирасида Баҳрайнга қарши сафарда ўйинда олганди.

Йиллар

Карпенко 2003-2012 йиллар давомида терма жамоада фаолият олиб борган. У 2011 йилда энг кўп учрашув ўтказган – 14та.

Виктор Карпенко терма жамоадаги энг сўнгги учрашувини 2012 йил 6 август куни Ливанга қарши ўтказган. ЖЧ-2014 саралашидаги ўйинда дуранг қайд этилган 1:1.

Виктор Карпенконинг юбилей ўйинлари

№	Рақиб	Ўйин мақоми	Ҳисоб	Сана	Дақиқаси
1	Белоруссия	Ўртоқлик учрашуви	2:2	04.02.2003	74
10	Саудия Арабистони	ЖЧ-2006 саралаши	0:3	06.08.2005	45
20	Озарбойжон	Ўртоқлик учрашуви	0:0	02.07.2007	66
30	Иордания	Ўртоқлик учрашуви	4:1	03.22.2008	45
40	Албания	Ўртоқлик учрашуви	0:1	08.11.2010	90
50	Жанубий Корея	Осиё Кубоги-2011	2:3	01.28.2001	87
60	Ливан	ЖЧ-2014 саралаши	1:1	06.08.2012	90

Кейинги жума куни Одил Аҳмедов ҳақида маълумот берамиз.

Нарзулла Сайдуллаев тайёрлади.

Терма жамоа гвардиячилари №10. Виктор Карпенко