Дастлаб сўзга клуб раиси Тохир Кападзе чиқди: - Авваламбор барчаларингиз хуш келибсизлар! Сизларни кўриб турганимиздан жудаям хурсандмиз. Худога шукурки, бизни қўллаб-қувватлайдиган сиздек журналистларимиз ва мухлисларимиз бор. Бизнинг олдимизга катта мақсадлар қўйилган. Катта умидлар билан янги ўйинчилар таклиф этиб таркибни кучайтиришга ҳаракат қилдик.

Ишқибозларимизга шуни айтишим керакки, бизнинг жамоамизда Фарғона нонини еганлар, жамоамиз учун жонини берадиганлар ўйнашга хақли. Бизга ҳам легионерлар ҳам керак. Лекин биз олиб келадиган легионер барча ўйинчилардан бир бош устун бўлишлари талаб этилади. Бизни ўйинчиларимиз ҳам шу легионер ўйинчиларни ўйинини кўриб, олдинга интилишлари керак. Бугунги кунда бундай кучли легионер ўйинчи олиб келиш учун бизнинг молиявий имкониятларимиз йўл қўймайди. Шунинг учун асосий ҳаракатни ўзимизда тўп сурган ўйинчиларга ва келажаги порлоқ ёшларни жалб этишга қаратдик. Мен бугун ишонч билан айтишим мумкинки, ишқибозларимиз олдида юзимиз ёруғ. Берган ваъдаларимизни устидан чиқяпмиз. Мана 6та трансфер қилган бўлсак, уларни ҳаммаси яхшилаб ўйлаб қилинан трансферлар ҳисобланади. Бу ўйинчиларни таклиф этишда нафақат майдондаги ҳаракатларига эътибор бердик, балки майдондан ташқаридаги инсонийлик хислатларини ҳам инобатга олдик. Мен ўйлайманки, биз олиб борган трансфер сиёсатимиздан сиз мухлисларимиз ҳам, мураббийларимиз ҳам хурсанд бўлишади. Жамоамизни олдига қўйилган мақсадларга эришишимизда бу йигитларни ёрдами бизга қўл келиши мумкин.

Шундан сўнг фахрий футболчи Акмал Холматов ўз фикрларини билдирди: Маълум муддатли танаффусдан сўнг яна қадрдон жамоамга қайтдим. Аввалги 11 йиллик фаолиятим давомида бу жамоа ва унинг мухлислари менинг оилам бўлиб қолган эди. Хозир "Нефтчи" жамоаси ўзига ярашмайдиган ўринда турибди. Мен жамоамиз ўйинчилари номидан шуни айта оламанки, биз қўлимиздан келганча ҳаракат қиламиз. Жамоани олдинги савиясига қайтиши учун боримизни берамиз. Фақат сиз мухлислардан шуни сўрардимки, бизни майдонга келиб қўллаб-қувватлашда давом этинглар. Биз сизларни ишончларингни оқлашга ҳаракат қиламиз.

Тадбир сўнггида мухлислар ва журналистлар футболчилардан ҳамда мураббийлардан ўзларини қизиқтирган саволларига жавоблар олишга муваффақ бўлдилар.

Комилжон Икромов ёзиб олди.

Тохир Кападзе: “Барча трансферлар яхшилаб ўйлаб қилинди”