Олмалиқда мезбон АГМК Тошкентнинг "Бунёдкор" жамоасини қабул қилади. Қайсидир маънода турнинг қизиқарли ва муросасиз кечиши кутилаётган ўйини десак муболаға бўлмайди. Биз эса мазкур баҳс олдидан ўз вақтида икки жамоа таркибида тўп тепган дарвозабон, айни пайтда "Нефтчи" дарвозасини қўриқлаётган Акбар Тўраевнинг фикрлари билан қизиқдик.

"Фикримча, стадионга ташриф буюрадиган мухлислар жанговар ўйин гувоҳига айланишади. Икки жамоада ҳам яхши савиядаги футболчиларнинг йиғилганлиги ўйинни қизиқарли ўтишини таъминлайди, деб ўйлайман. Гарчи "Бунёдкор" сафида ўз академияси тарбияланувчилари кўп бўлсада, бу уларнинг кучсизлигини англатмайди. Академиядан бирга катта бўлган футболчилар ўртасида бир-бирини тушуниш яхши бўлади. АГМКда эса "Бунёдкор"га нисбатан олиб қараганда тажрибалироқ ижрочилар йиғилганини кўришимиз мумкин.
Кучлар тенг, дея оламан. Аниқ бир жамоани имкониятини юқори баҳоламайман. Бугун кимда иштиёқ ва интилиш кучли бўлса, ўша жамоага омад кулиб боқади. Ўйлайманки, чиройли ва савияли футбол кўрамиз",- дейди Акбар Тўраев.

Эслатиб ўтамиз АГМК - "Бунёдкор" ўртасидаги учрашув бугун соат 18:50да бошланади.

Coca-Cola Суперлига. 8-тур

14 май, жума

АГМК – БУНЁДКОР
Ҳакамлар: Илгиз Танташев, Андрей Цапенко, Тимур Гайнулин, Илья Ильин
Назоратчи: Марат Исмаилов
VAR ҳаками: Акобирхўжа Шукуруллаев
VAR ассистенти: Жаҳонгир Саидов
VAR назоратчи: Валентин Коваленко
Оператор: Шерали Жоналиев
Техник мутахассис: Муҳитдин Қамбаров
Комиссар: Шоҳруҳ Саид.

"Бунёдкор" АГМКни 3та ўйиндан бери юта олмаяпти ёхуд Мақсудов Қосимовга қарши

Учрашув олдидан. "Иштиёқ ва интилиш кучли бўлган жамоага омад кулиб боқади"