"Барча кўрди, бугунги баҳсда "Навбаҳор" устунлик қилди. Сабаби биз охирги 24 кунда 8-учрашувни ўтказдик. Инсон танаси робот эмас чарчайди. Шу боис бугун ўз режамиз бор эди. Объектив қарасак рақиб бугун кўпроғига лойиқғэди. Ўз навбатида шогирдларимга ҳам миннатдорчилик билдираман. Бугунги бир очко биз учун қадрли",- деди Улуғбек Бақоев.

- Бугунги бошланғич таркибга қараб асосий эътибор ОФК кубогини ютиш деб ўйладик...

- Йўқ, биз учун барча мусобақадиги ҳар бир ўйин муҳим. Шунчаки яқинда ОФК кубогида ўйнадик ва бугун уч нафар ҳужумкор футболчини захирада қолдиришга қарор қилдик.

- "Сўғдиёна" зерикарли ўйин намойиш этади деб ҳисоблайсизми?

- Нима учун? Ҳар бир мураббийнинг ўз қараши бўлади. Мураббий сифати нима билан ўлчанади? Натижа билан тўғрими? Чиройли ва ҳужумкор ўйин намойиш этиб охирги ўринда бўлиш кимга ёқади?

- Бугун "Сўғдиёна" дуранг учун ўйнадими?

- Ҳа шундай. Рақиб бугун биздан устунлик қилди, чиройлироқ ўйнади. Аммо биз ҳам ўйнадик. Шу сабабли бугунги очко биз учун муҳим.

- Нима учун ғалаба учун ўйнамадингиз? Ғалаба қозонишига кўзингиз етмадими?

- Агар бошидаги гапларимни эшитган бўлсангиз 24 кун ичидаги саккизинчи ўйинни ўтказдик дедим. Инсон организми темир эмас. У 15, 20 ёки 30 дақиқа ўйнаши мумкин. Бугун йигитларга дам бердик. Ғалабага умид қилгандик, аммо дуранг ўйнадик.

- Ўзбекистон кубогида Наманганда "Навбаҳор" меҳмони бўласизлар...

- Яхши ўйин бўлади. Чемпионатда ёнма-ён жойлашган икки жамоа ўртасидаги баҳс. Наманганда мухлислар билан муҳит ҳам бошқача бўлади. Бугунги учрашувдан олдин айтгандим: Кучли жамоа ютсин.

Улуғбек Бақоев: "Объектив қарасак рақиб кўпроғига лойиқ эди"