"Эртага қизиқарли ўйин кутиб турибди. "Бунёдкор"да гуруҳдан чиқиш имконияти қолмаган, ўз мухлислари қаршисида босимсиз ўйнайди. Бу уларга устунлик беради. "Ал Наср" доим ғалаба учун майдонга тушади эртанги баҳс ҳам бундан мустасно эмас. Ғалаба учун курашамиз", - дейди Да Сильва.

Ҳуссайин Шайян: "Мураббийнинг фикрларига қўшиламан. Эртага ғалаба учун ўйнаймиз".

- "Ал Наср" Тошкентга асосий таркиб билан келганми?
- Биз Ўзбекистонга асосий таркиб футболчилари билан келдик.

- "Бунёдкор"га қарши ўз майдонингларда дуранг ўйнаган эдинглар. Ўша ўйин ҳақида нима дея оласиз?
- Ўша учрашувда биз бир қатор вазиятлардан фойдалана олмагандик. Эртага вазиятлардан фойдалансак ғалаба қозонамиз.

- "Ал Наср" ОЧЛда ўз тарихида сафардаги ўйинларда умуман ғалаба қозона олмаган. Бу эртага жамоага босим юкламайдими?
- ОЧЛ нуфузли мусобақа, унда кучли клублар ўйнайди. Бу миллий чемпионат эмас. Эртага тарихни ўзгартиришга уринамиз.

- "Бунёдкор" бу мавсум ОЧЛда энг ёш жамоалардан бири бўлди. Жамоага гуруҳдан чиқа олмаслигига нима сабаб бўлди дея оласиз?
- ОЧЛда ҳар бир ўйин муҳим. "Бунёдкор" ўз майдонида мағлуб бўлгани учун ҳам кейинги босқичга чиқа олмади деб ўйлайман.

Нарзулла Сайдуллаев

Хорхе Да Сильва: "Эртага тарихни ўзгартиришга уринамиз"