1942 йилги ЖЧга мезбонликни Германияга ваъда қилишган бўлса-да, асосий номзод сифатида Италия ва Бразилия кўрсатилганди. Аммо бошланган уруш натижасида ҳамма нарса чиппакка чиқади. Урушдан кейинги ФИФАнинг илк конгресси 1946 йилга тўғри келди. Иккинчи жаҳон урушидан кейин Италия ҳеч қанақасига ЖЧни қабул қила олмасди. Натижада мезбонлик ҳуқуқини қўлга киритиш учун энг оптимал вариант Бразилия эди. Якунда шундай бўлди ҳам.

Муддатидан аввал "чемпион" бўлган Бразилия

Конгрессда Италия ФФ раҳбарларидан бири Отторино Барассининг нутқи қарсакларга сабаб бўлган эди. Италия терма жамоаси ЖЧ-38 ғолиб бўлганидан кейин Кубокни сақлаш учун Швейцария банкига қўяди. Уни олиш вақти келганда, барча масъулиятни ўз бўйнига олган ҳолда Отторино Барасси кубокни уйида сақлай бошлайди. Уруш вақтида уйига ҳужум қилган душманлар кубокни қидириб топа олмайдилар. Калласини ишлатган Отторино Барасси кубокни этик ичига солиб, уни кўзга кўринадиган жойга қўяди. Кубок изидан келганлар эса аксинча, беркитилиши мумкин бўлган ерларни текшириб топа олишмайди.

Кубокни ушлаб туриб ҳикоясини айтиб берган Барасси қарсаклар садоси остида уни ФИФА президенти Жюле Римега топширади.

ЖЧда иштирок этиш истагини 29 мамлакат билдирди. Иккинчи жаҳон уруши ўчоғини ёққани учун ФИФА Германия ва Япония терма жамоаларини мундиалга қўймади. Италияни эса кечирди. Лекин Италия терма жамоаси катта жудоликка учради. ЖЧга оз қолган бир пайтда терма жамоанинг асосини ташкил қилган "Торино" клуби авиаҳалокатга учрайди. Шунга қарамай, янгидан тузилган таркиб кемада Бразилия томон йўлга чиқади. Собиқ иттифоқ, Чехославакия ва Венгрияда урушдан кейин тикланиш ишлари олиб борилаётгани учун ЖЧда иштирок этмадилар. Аргентина эса Бразилия билан айтишиб қолгани учун Чили, Боливия, Парагвай ва Уругвай саралаш мусобақасини ўтказмасдан туриб ЖЧ йўлланмасини қўлга киритади.

Ҳаммасидан ҳам қизиғи Осиёда бўлган. Индонезия, Филиппин ва Бирма давлатлари ЖЧ саралашидан бош тортганлиги учун Ҳиндистон тўғридан-тўғри ЖЧга чиқади. Қуръа натижаларига кўра, Италия, Парагвай ва Швеция билан бир гуруҳдан ўрин олган ҳиндистонликлар ЖЧга яқин қолганда мусобақада иштирок эта олмасликларини билдиришади. Бунга икки ҳолат сабаб бўлади, бири узоқ парвоз ва ортиқча харажат, иккинчиси ФИФАнинг ялангоёқ футбол ўйнашга рухсат бермаганлиги.

Финалда 200 000 нафар мухлисни бағрига сиғдирган "Маракана"

ФИФА Буюк Британияга иккита йўлланма беради. Бу ўринлар учун 4 жамоа кураш олиб бориши керак эди. Булар, Англия, Шотландия, Шимолий Ирландия ва Уэльс. Шотландия ҳукумати раҳбарлари терма жамоасини гуруҳда биринчи ўринни қўлга киртсагина ЖЧга юборишини айтади. Сўнгги турга келиб Англия ва Шотланияда бир хил, 4 очкодан бўлади. Сўнгги ўйин ким биринчи бўлишига ойдинлик киритарди. Бу икки жамоа муддатидан аввал 1 ва 2-ўринларни қўлга киритиб бўлган бўлса-да, Буюк Британиянинг биринчи рақамли терма жамоаси бўлиш учун муҳим эди. Якунда Англия ғалаба қозонади, Англия терма жамоаси сардори Билли Райт рақиб сардори Жорж Янгдан ҳукумат раҳбарларини фикрларини ўзгартиришини сўраши кераклигини айтади, аммо бундан ҳеч қандай наф бўлмаган. Натижада Шотландия мундиал йўлланмасини қўлга киритган бўлса-да, мундиалда иштирок эта олмайди. Шотландия ўрнига мусобақада иштирок этиш истагида бўлган Франция, қуръадан кейин Ҳиндистон каби мусобақани тарк этади. Натижада сўнгги, 4-гуруҳда икки жамоа қолади.

1-гуруҳ
Бразилия — 5
Югославия — 4
Швейцария — 3
Мексика — 0

2-гуруҳ
Испания — 6
Англия — 2
Чили — 2
США — 2

3-гуруҳ
Швеция — 3
Италия — 2
Парагвай — 1

4-гуруҳ
Уругвай — 2
Боливия — 0

Турнирнинг очилиш ўйин "Маркана" стадионида бўлиб ўтган. Бразилия - Швейцария терма жамоалари ўртасидаги учрашувга бугунги кунгача ЖЧ тарихида рекордлиги сақлаб келаётган миқдорда, 160 000 нафар мухлис стадионга ташриф буюрган. Кўчаларда юзага келган тирбандлик шу қадар катта эдики, бугунги Москва тирбандликлари ҳижолат. Ҳаттоки ўйин бош ҳакамлари ҳам машиналар тирбандлиги натижасида ўйинга зўрға етиб келганлар.

Бразилиянинг ташаббуси билан мусобақа регламентига ўзгартириш киритилади. Шу кунга қадар ЖЧ плей-офф тизимида ўтказилган эди. Бразилиянинг таклифига кўра гуруҳ ғолиблари, финал гуруҳида чемпионни аниқлашлари керак эди. Финал гуруҳига Угургвай, Бразилия, Швеция ва Испания етиб келади. Швеция ва Испанияни йирик ҳисобда мағлубиятга учратган Бразилияни сўнгги турда дуранг ҳам қониқтирарди.

Финал босқичи:
Бразилия – Швеция 7:1
Уругвай – Испания 2:2
Бразилия – Испания 6:1
Уругвай – Швеция 3:2
Швеция – Испания 3:1

Аммо финалга тенг ўйинда Бразилиядан омад очиқчасига юз ўгиради. Йил сайин футболда такомиллашиб бораётган Бразилия 47-дақиқада ҳисобни очади. Кейинги иккита тўпга уругвайликлар муаллифлик қилишади. Ўйиндан аввал эса Бразилия чемпион бўлиб улгурган эди. Маҳаллий газеталар аллақачон "Биз чемпионмиз", "Биринчи жаҳон кубоги муборак бўлсин", каби сарлавҳалар остида газеталарни чиқариб бўлганлар. Финалдан кейин айтилиши керак бўлган гаплар ёзиб футболчиларга ёдлатилган, ҳамма-ҳамма Бразилияни чемпион бўлишига ишониб бўлган эди. Аммо ўйин...

Жигья 79-дақиқада Барбоза дарвозасини ишғол қилаётган палла

Уругвай – Бразилия 2:1
Голлар: Скьяффино, 66, Жигья, 79 – Фриаса, 47.
Уругвай: Масполи, Матиас Гонсалес, Андраде, Техера, Гамбетта, Перес, Варела, Мигуэс, Жигья, Скьяффино, Моран.
Бразилия: Барбоза, Аугусто, Жувенал, Бигоде, Бауэр, Данило, Зизиньо, Жаир, Фриаса, Адемир, Чико.

Финал жадвали:
Уругвай — 5
Бразилия — 4
Швеция — 2
Испания — 1

Учрашувдан кейин 200 000 нафарга яқин мухлис билан тўлиб тошган "Маракана"даги мухлисларнинг 200 нафарга яқини ўйиндан кейин ўзини ўлдиради. Бундай даҳшатни кўрган Уругвай футболчиси Варела, "агар футбол Бразилия учун бундай аҳамият касб этишини билганимизда, ғалаба қозонмаган бўлардик", - дейди.

Бу воқеа тарихга «Мараканазо» деб кирган.

Тўпурарлар: Адемир (Бразилия) – 8, Эстанислао Басора (Испания), Оскар Мигуэс (Уругвай) – 5тадан.

Хориж маълумотлари асосида
Нодирхўжа Юлдашев

ЖЧга 17 кун қолди: Бразилия - 1950!