Дастлаб майдонга “Пахтакор” ва “Андижон” жамоалари чиқиб келишди. Учрашув стартидаёқ андижонликлар ҳисобни очишга эришдилар ва танаффусгача битта тўп фарқидаги ғалабани сақлаб туришди. Иккинчи бўлимда “Пахтакор” футболчилари ўйинида анчайин жонланиш кузатилди. Бунга асосий сабаб сифатида тошкентликлар мураббийи Сергей Токов таркибда бирданига 7-8та ўзгартириш киритгани бўлди. Натижада, “Пахтакор” футболчилари кетма-кет уч марта андижонликлар дарвозасини ишғол қилишиб, якунда 3:1 ҳисобида зафар қучишди.

Иккинчи финалчини аниқлашда Тошкент дербисининг гувоҳига айландик. Яъни, “Бунёдкор” ва “Локомотив” қарама-қаршилиги бўлиб ўтди. “Бунёдкор-2001” футболчилари Отабек Юсуповнинг боши билан киритган голи эвазига ҳисобни очишди. Вазиятни ўнглаш учун олдинга ўтган “темирйўлчилар” икки марта “қалдирғочлар” дарвозасини ишғол қилишиб, ҳисобда олдинга ўтиб олишди. Биринчи таймни бой берган “Бунёдкор”, иккинчи бўлимда умуман бошқача ўйин намойиш этди. Мураббийларнинг далдаси ёш “қалдирғочлар”нинг ўйинини жонлантирди, десак муболаға бўлмайди. Шунга яраша “Бунёдкор” футболчилари ирода кўрсатиб, баҳсни 3:2 ҳисоби билан ўз фойдаларига ҳал қилишди. Сардор Усмоновнинг дубли “Бунёдкор-2001”га финал эшикларини очди.

Ярим финаллар
25 июнь. “Чилонзор” стадиони
9:00. “Пахтакор” – “Андижон” 3:1
10:00. “Бунёдкор” – “Локомотив” 3:2

Финал
26 июнь. ЎФФ суъний майдони
11:00. “Пахтакор” – “Бунёдкор”

Жўра Хонназаров турнири. “Бунёдкор-2001” финалда!