Uchrashuvdagi dastlabki gol muallif Abdulatif Abduqodirov shu kuni o'z tug'ilgan kuniga o'zi ajoyib sovg'a qildi desak mubolag'a bo'lmas. Birinchi liga ishtirokchisi “NBU-Osiyo”dan davralar oralig'ida “Andijon”ga kelib qo'shilgan 27 yoshli hujumchi muxlislarda yaxshi taassurot qoldirishga urinmoqda. Uchrashuvdan so'ng Abduqodirov bilan qisqacha suhbatlashdik.

- Avvalo jamoangizning bugungi muhim g'alabasi bilan tabriklaymiz. O'yin haqida nima deysiz?
- Tabrik uchun rahmat. Bilasizmi hayotda hech bir narsaga osonlikcha erishilmagani kabi, bugungi g'alabaga ham engil erishdik deb o'ylamiman. Garchi raqibni mag'lub etgan bo'lsakda, qiyin bo'ldi. Oldimizda boshqa yo'l yo'q edi. Faqat g'alabani o'ylab tushgandik. Boshqacha aytganda, uch ochko suv va havodek zarur edi.

- Oldingi turda “Paxtakor”dan uchralgan mag'lubiyat, bugungi o'yin oldidan ruhan o'z tasirini o'tkazmadimi?
- Yo'q, asosiy etiborni g'alabaga qaratgandik. Chunki bizni faqat uch ochko qoniqtirardi. “Paxtakor”ni ham yutsak bo'lardi deb o'ylayman. Biroq ayrim sabablar bunga yo'l qo'ymadi.

- Bugungi g'alaba ko'proq nimani evaziga erishildi deb o'ylaysiz?
- Birinchi navbatda, murabbiylarning to'g'ri ko'rsatmalari tufayli. Qolaversa ahillik ham asosiy o'ringa chiqadi. Chunki bugungi o'yindan oldin barcha yigitlar bilan g'alaba to'g'risida o'ylab, ahil bir oila kabi yuqori suratda tayyorgarlik ko'rgandik.

- Tug'ilgan kuningizda gol urishingizni kutganmidingiz?
- Yo'q, buni kutmagandim. Lekin maydonga gol uraman deb chiqqandim. Chunki hujumchining vazifasi raqib darvozasiga yo'l topa bilish.

- Birinchi davrani “Andijon”da o'tkazgan ukangiz Alisher Azizov bugun “Qizilqum” zaxira o'rindig'idan joy oldi. Atingchi ukangizga qarshi o'ynashni qanchalik istagandingiz?
- Ukam o'ynaganda, bizga yanada qiyin bo'lardi deb hisoblayman. Ilgari yoshlikda bir-birimizga qarshi o'ynagan paytlar bo'lgan. Alisherning o'yinida ko'p narsa bor. Lekin huquqiy jamoasi “Paxtakor” negadir ishonch bildirmayapti. To'g'risini aytganda, Alisherni o'zimdan kuchli deb bilaman.

- Andijonlik muxlislar haqida taassurotlaringiz qanday?
- Oldindan shuni bilardimki, vodiyda, ayniqsa Andijonda ishqibozlik yuqori darajada ekanligin. Ular bugungi o'yinda ham bizni tinimsiz qo'llab-quvvatlab turdi. Buning uchun barcha sevimli ishqibozlarimizga minnatdorchilik bildirib qolaman. Nasib qilsa ularni kelgusi bahslarda ham g'alabalar bilan xursand qilamiz degan umiddaman.

Abdulatif Abduqodirov: “Qizilqum”ni ahillik evaziga yutdik”