Dastlabki turda “Paxtakor”da, keyin safarda “Qizilqum”ga va Andijonda “Mashal”ga yutqazib muxlislarni qattiq ranjitib qo'ydi. Barcha o'yinlarda “Burgutlar” 0:1 hisobida mag'lubiyatga uchradi. Ayniqsa, 3-turda “Mashal” jamoasiga engilishi kutilmagan natija bo'ldi. Ikkala klub o'tgan yili birinchi ligada qatnashib, oliy liga yo'llanmasini qo'lga kiritishgandi. Etiborlisi, o'tgan yili ham muborakliklar Andijondan 0:1 hisobidagi g'alaba bilan qaytishgandi. Umuman olganda, birinchi ligada andijonliklar ikkala o'yinda ham yutqazishgan.

“Burgutlar” uchun mazkur mavsum o'zgacha ahamiyatga ega ekanligini barcha yaxshi biladi. Chunki klub o'zining 50 yillik yubileyini nishonlaydi. Aslida ushbu yubileyga tayyorgarlik boshqacha bo'lishi lozim edi. Lekin 2012 yili jamoa kutilmaganda oliy ligani tark etdi. Natijada reja o'zgarib 50 yillik yubiley uchun “Andijon”ni oliy ligaga qaytarish vazifasi qo'yildi. Aslida esa kuchlilar orasini tark etmagan holda jamoani yanada yaxshiroq shakllantirib mazkur yilda sovrinli o'rinlar uchun kurashishi rejalashtirilgandi. Lekin o'sha yili klubda bosh murabbiy almashib hammasi o'zgarib ketdi. Azamat Abduraimov bosh murabbiy bo'lib kelganida muxlislar quvonishgandi. Undan ko'p narsalar kutishdi. Lekin hozirgi vaziyatda unga bo'lgan fikrlar va munosabat o'zgarmoqda. Bu bilan uni tanqid yoki qoralamoqchi emasmiz.

Biroq “Andijon”ning hozirgi holatini ko'rib shunga amin bo'lyapmizki, jamoa mavsumga tayyor emas. Xali ham o'tgan yilgi birinchi ligadagi o'yinlari kabi shunga monand o'yin ko'rsatayotgandek tasavvur uyg'otmoqda. Vaholanki, yangi mavsum uchun tarkib deyarli yangilandi. “Andijon”ga Timur G'aniev, Muxiddin Xudoyorov, Timur Sultonov, Sergey Docenko, Aleksey Kasyan, Shaxzod Shaymanov, Javlon Mirabdullaev, Ibrohim Otaxonov, Mirzakamol Kamolov, Anvar Rajabov, Kamron Kapadze, Shuhrat Mirxoldirshaev, Viktor Raskov va Alisher Azizov taklif qilindi. Ularning orasida Kasyan, Otaxonov, Kamolov, Mirholdirshaev kabi futbolchilar bungacha ham “Andijon”da o'ynashgandi. Lekin uchta o'yinda jamoa o'zidan ijobiy taassurot qoldirgani yo'q. Hattoki, haligacha gol ura olmayotgani jiddiy muammo bo'lib turibdi. Azamat Abduraimovni o'tmishda qanday hujumchi bo'lganligini yaxshi bilamiz. Shuning uchun u hujumchilarga ko'proq etibor qaratishi kutilgandi. Ammo o'yinlar shuni ko'rsatyaptiki, jamoa baribir asosiy etiborini himoyaga qaratgan holda o'yin ko'rsatmoqda. Negadir o'z uyida ham beshta himoyachi bilan o'ynayotgani etirozlarga sabab bo'lmoqda. Natijada hujumda tuzukroq imkoniyatlar ham yaratilmayapti. Bundan tashqari chiziqlar bo'yicha o'zaro uzilishlar bo'layotganligi ham sezilib turibdi. Umuman olganda, hali qilinishi kerak bo'lgan ishlar juda ko'p ekanligini alohida aytish kerak.

Andijonda futbolni xaddan ortiq sevadilar. Shuning uchun dastlabki turda “Paxtakor” bilan o'yinda “Sog'lom avlod” stadioniga 18221 nafar muxlis keldi. Ular katta futbolni sog'inib qolishgandi. Bundan tashqari “Andijon”dan bu yil yaxshi natijalarni kutishyapti. Lekin mag'lubiyat hech kimga yoqmaydi. O'z uyida “Paxtakor”ga, safarda “Qizilqum”ga yutqazgach 3-turda Andijonda “Mashal” bilan uchrashuvda tomoshabinlar soni keskin ravishda kamayib ketdi. Bunga sabab jamoaning mag'lubiyatlari va ko'rsatayotgan nursiz o'yindir. Ayniqsa, oxirgi uchrashuvdan keyin ishqibozlar jiddiy ravishda etiroz bildirishdi. Bu ketishda muxlislarni yanada yo'qotishi va ularda ishonchsizlikni oshirishi turgan gap. Oldinda “Olmaliq”qa qarshi yana bir jiddiy o'yin kutmoqda. Ochig'ini aytganda, mazkur uchrashuvdan mahalliy muxlislar ijobiy natija kutishdan cho'chimoqdalar. “Qizilqum” maydonida ham jamoadan ijobiy natijani, hech bo'lmaganda bir ochkoni kutgandilar. Bu safargi raqib esa yanada kuchli.

Tan olish lozimki, Igor Shkvirin jamoasi “Andijon”dan ustunroq. Ammo uchrashuvdan avval aniq yutqazadi deb ham aytib bo'lmaydi. Agarda durang qayd etilsa buni andijoniklar uchun deyarli g'alabaga tenglashtirish mumkin. Bu esa jamoaning keyingi o'yinlariga ijobiy tasir ko'rsatishini unutmaslik lozim. Buning uchun murabbiy o'zini oqlamayotgan taktikadan voz kechishi va samarali bo'lgan yangicha o'yin uslublarini qo'llashi lozim. Dastlabki uchta o'yindagi bir xil 1:0 hisobidagi mag'lubiyatlar shuni ko'rsatyaptiki, jamoa chindan ham himoya asoslangan holda o'ynayotganidan darak berib turibdi. Ammo muxlislarga hujumkor o'yin yoqadi. Avvaldan “Andijon” raqiblar uchun tajovuzkor, hujumkor jamoa sifatida qarshilik qilib kelgan. Butun o'yin davomida himoyaga asoslangan holda to'p surish baribir o'z darvozasidan to'p o'tkazib yuborish bilan yakunlanadi-da! Shuningdek, “Andijon” 1999 yilgi mavsumni ketma-ket uchta mag'lubiyat bilan boshlagan. Lekin o'shanda jamoa dastlabki uchta turda ikkita gol urgan.

“Andijon”ning oliy ligada Abduraimov boshchiligida o'tkazgan o'yinlari
2012 yil
17-tur “Andijon” – “Qizilqum” – 5:1
18-tur “Mashal” – “Andijon” – 1:0
19-tur “Andijon” – “Lokomotiv” – 0:1
20-tur “Andijon” – “Paxtakor” – 2:4
21-tur “Neftchi” – “Andijon” – 2:0
22-tur “Andijon” – “Nasaf” – 3:4
23-tur “Dinamo” – “Andijon” – 3:0
24-tur “Andijon” – “Olmaliq” – 1:4
25-tur “Buxoro” – “Andijon” – 1:0
26-tur “Andijon” – “Metallurg” – 4:3
2014 yil
1-tur “Andijon” – “Paxtakor” – 0:1
2-tur “Qizilqum” – “Andijon” – 1:0
3-tur “Andijon” – “Mashal” – 0:1

Azamat Abduraimov jamoani 2012 yilning ikkinchi yarmidan boshqarishga kirishdi. Shu vaqtga qadar “Andijon” uning boshchiligida oliy ligada 13ta o'yin o'tkazdi. Murabbiyning birinchi ligadagi faoliyati esa mutlaqo hisobga olinmaydi. Negaki, u erdagi saviyani hamma yaxshi biladi. Abduraimovning o'rnida boshqa mahalliy murabbiy bo'lganida ham “Andijon”ning elitaga qaytishiga hech kim shubha qilmasdi. Qolaversa, oliy ligaga chiqish uchun “Mashal” bilan “Andijon”dan boshqa nomzodning o'zi ham yo'q edi. Shu sababli Azamat Beradorivichning asosan oliy ligadagi natijalariga to'xtalamiz. Ko'rsatgichlar shuni bildirmoqdaki, murabbiy boshchiligidagi natijalar o'ta qoniqarsiz. U “Andijon”dagi debyutini “Qizilqum”ga qarshi boshlab 5:1 hisobidagi g'alaba bilan boshlagandi. O'sha o'yin 2012 yilning 26 avgust kuni o'tkazilgan. Abduraimov esa rasman 24 avgustda ishga kirishgan. Unga qadar jamoani mazkur uchrashuvga Vitaliy Ligay bilan Abdurashid Ismoilov tayyorlagandi.

Xullas, Abduraimovning debyuti muvaffaqiyatli chiqqan bo'lsada, keyingi ketma-ket etti o'yiin boy berdi. Bu borada u “Dinamo”da qayd etgan antirekordini yangiladi. Gap shundaki, Samarqandda ishlagan paytida ketma-ket olti uchrashuvda mag'lubiyatga uchragach istefoga chiqqandi. “Andijon”da esa u birin-ketin etti marta yutqazdi. Faqat oxirgi turda hech nimani hal qilmaydigan uchrashuvda “Metallurg” 4:3 hisobida malub etildi. Ungacha jamoa oliy ligani tark etib bo'lgandi. Lekin Abduraimov klubda qolib hammasini boshidan boshlashga qaror qildi. Kutilganidek jamoa yana bir yilning o'zidayoq oliy ligaga qaytdi. Ana endi ko'pchilik bu murabbiyning asl kuchi qanday ekanligini ko'rishga qiziqdilar. Lekin uning hali hamon mag'lubiyatli seriyalari tugamaganligi ko'rinib turibdi. Qiziq, bosh murabbiy “Andijon”dagi o'zining uchinchi g'alabasiga qachon erisharkin? Hisoblab chiqsak, u hozirgacha “Burgutlar” bilan oliy ligada faqat ikki marta yutgan xolos. Ishonamizki, Abduraimovning uchinchi g'alabasiga erishishi muxlislarni uzoq kuttirib qo'ymaydi. Agar “Andijon” qachondir uch ochkoni qo'lga kiritsa, bu jamoaning oliy ligadagi umimiy 210-g'alabasiga aylanadi.

FIRDAVSXON.

Abduraimov qachon g'alabaga erishadi?