"Bunyodkor" akademiyasida murabbiy sifatida ishlab kelgan Akmal Risqullaev olamdan o'tgani munosabati bilan, marhumning yaqinlariga chuqur hamdardlik bildiramiz.

Akmal Risqullaev 1979 yil 24 oktyabrda Toshkent shahrida tug'ilgan. 8 yoshida “Paxtakor” futbol klubi akademiyasiga borgan. U erda 16 yoshgacha shug'ullangach, ikkinchi ligada “Vatanparvar” harbiy sport klubi safida maydonga tusha boshladi. So'ngra Rustam Mirsodiqov uni oliy ligaga taklif etdi. Akmal 14 yillik professional faoliyati davomida “Sho'rtan”, “Navbahor”, “Lokomotiv”, “Traktor”, “Dinamo”, “Qizilqum” kabi klublarda o'ynagan. Shuningdek, Qozog'istonning “Yassi Sayram” jamoasida ham bir yarim yil to'p tepgan.

- Futbolni tanlab kam bo'lmadim. Bir qator kuchli jamoalar sharafini himoya qilganimdan xursandman. Turli murabbiylar qo'l ostida shug'ullanib, tajriba orttirdim. Endi o'zim yoshlarga saboq beryapman, - degan edi Akmal Risqullaev.

2012 yildan Sergey Lushchan taklifiga binoan Akmal Risqullaev futbolchilikda o'rgangan bilimlaridan foydalanib, yosh “qaldirg'ochlar”ga talim bera boshlagandi. O'z navbatida, “C” toifadagi licenziyaga ega bo'ldi.

“Bunyodkor” akademiyasida ish boshlaganiga ko'p bo'lmagan Akmal Risqullaev malum muddat 8-9 yoshli tarbiyalanuvchilarga saboq berardi va ular bilan Turkiyadagi xalqaro turnirda birinchi o'rinni qo'lga kiritdi. Bu uning xalqaro maydonda murabbiylik sohasidagi dastlabki unvoni bo'lgan.

Shuningdek, 2002 yili tug'ilgan tarbiyalanuvchilari Koreyadagi turnirda zafar quchishgan. Akmal Risqullaev Toshkent shahar birinchiligida o'z shogirdlarining imkoniyatlarini yuqori baholashini ham aytib o'tgan edi. Ular orasida ayniqsa, istedodli deya qarayotgan Otabek Jo'raqo'ziev, Jasur Jaloliddinov, Diyor Rahimqulov, Abdurauf Bo'riev kabi futbolchilardan umidi katta edi.

Akmal Risqullaev Abdumajidovich

Tug'ilgan sanasi: 24.10.1979

Faoliyat olib borgan klublari:

1998 yil - MHSK

2000-2003 yil birinchi davra - "Traktor"

2003 yil ikkinchi davra - "Dinamo"

2004 yil "Yassi Sayram" (Qozog'iston)

2005 yil birinchi davra - "Lokomotiv"

2005 yil ikkinchi davra - 2006 yil "Sho'rtan"

2007-2009 yil birinchi davra - "Navbahor"

2009 yil ikkinchi davra - 2010 yil - "Qizilqum"

Akmal Risqullaev oilasi va yaqinlariga hamdardlik bildiramiz