Uchrashuvda Otabek Isroilovning dubli farg'onaliklarga uch ochko keltirdi. Mazkur o'yindan so'ng, farg'onaliklar ustozi Amet Memetning fikrlarini tingladik.

- Amet Abdullaevich, avvalo jamoangizning bugungi g'alabasi bilan tabriklaymiz. Uchrashuv hususida fikrlaringiz qanday?
- Bugungi o'yin juda murakkab kechdi. Qanday bo'lmasin stadionga kelgan muxlislarimizni xursand qilmasak bo'lmasdi. Shuning uchun natijaga ko'rsatishga majbur edik. Buning uddasidan chiqdik deb o'ylayman. Uch ochkoni qo'lga kiritganimizdan xursandman. G'alaba qozonish hamisha yoqimli.

Bugun jamoam o'z o'yinini to'liq ko'rsatdi deya olmayman. Davralar oralig'ida tarkibimizga bir qator yangi futbolchilarni jalb etdik. Ularning oldingi o'yinchilar bilan to'liq tushunib ketishlari uchun ozgina vaqt kerak bo'ladi.

Toshkentda tashkil etilgan yig'in davomida bir nechta sinov-nazorat bahslarida ishtirok etdik. Ana shu o'yinlarda yigitlar yaxshi taassurot qoldirishdi. Oldinda qilinadigan ishlar ko'p hali. O'ylaymanki, vaqt o'tgani sari, turdan-turga o'yinimiz yanada shakllanib boradi.

Bugungi o'yinda optimal tarkibni tushirishni imkoni bo'lmadi. Albatta, bunga bir qator o'ziga xos sabablar bor. Xususan, Baxtiyor Yoqubov va G'ulom O'runovda jarohat mavjud. Yoqubov qanotda tezkor harakatlari bilan doim ijobiy taassurot qoldirib kelgan. O'runov esa Paxtakorda markaziy yarim himoyada barqaror o'yin namoyish etgan. Har ikkalasi ham mahoratli futbolchilardir. Yana shuni ham aytib o'tishim kerakki, G'ulomni sherlardan transferini to'liq sotib oldik. Endilikda futbolchi Neftchiga tegishli.

Umuman olganda, hozirgi tarkibimizdan qoniqish xosil qilmoqdaman. Ayniqsa, darvozabonlardan ko'nglim to'q. Bugungi o'yinda darvozamizni qo'riqlagan G'ayrat Hasanovni mahoratli posbon deb bilaman.

Chempionatni kuchli oltilikda yakunlashga harakat qilamiz. Uchlikdagi jamoalar bilan o'rtamizdagi ochkolar farqi ko'p. Lekin biz har bir o'yinda ochko jamg'arib, imkon qadar yuqori o'rinni band etishga harakat qilamiz.

Islombek Rustambekov yozib oldi.

Amet Memet: "Kuchli oltilikka kirishga harakat qilamiz"