Dastlabki bosqichdan keyin Sharq va G'arb mintaqasida 8tadan jamoa oliy liga yo'llanmasi uchun kurashni davom ettirmoqda. Ana shu jamoalar 1-davrada sakkizta o'yinni o'tkazib bo'ldilar. Garchi ayni paytda turnir jadvalida “Andijon” “Mashal”dan so'ng 2-o'rinni band etib turgan bo'lsa-da, Azamat Abduraimov shogirdlari juda faol o'yin o'tkazib birinchi davra g'olibi bo'lishdi.

Birinchi davrada andijonliklar 8ta o'yinning 7tasida g'alaba qozonishdi va faqat bitta uchrashuvda imkoniyatni boy berishdi xolos. Natijada jamoamiz 1-davrada hammadan ko'p 21 ochko jamg'ardi. “Mashal” esa 6ta o'yinda zafar quchib, ikki bor mag'lubiyatga uchradi va 18 ochko to'plab ikkinchi bo'ldi. Bundan tashqari sermahsullik borasida ham “Andijon” futbolchilari etakchilik qilishdi. Andijonliklar o'tkazilgan sakkiz uchrashuvda raqiblar darvozasini 27 marta ishg'ol etishdi. O'z darvozasidan 5ta to'p o'tkazib yuborishdi. “Mashal” esa 22ta gol urib, darvozasidan 6ta to'p olib chiqdi. Abduraimov shogirdlari “Orol” va “Zarafshon” darvozalariga 7tadan to'p kiritishdi. Shuningdek, “Xorzam” va “Registon” jamoalari bilan bo'lgan uchrashuvlarda ham yirik g'alabalarni qayd etishdi.

Birinchi davrada Lochin Soliev va Alisher To'xtasinov to'purarlik mahoratlarini namoyish etishdi. Ikkala futbolchi ham o'z hisobiga 7tadan gol yozib qo'ydilar. “Zarafshon” bilan bahsda Soliev pokerga erishganini takidlab o'tish joiz. Qolaversa, To'xtasinov ham, Soliev ham ketma-ket uchta o'yinda maydonni golsiz tark etishmadi. Shuningdek, 1-davrada Bahrom Abdurahimov 3ta, Akmal Jo'raboev, Rasul Rahmonov va Davron Tursunov ikkitadan gol urishdi. Qolaversa, Asqar Jadigerov va Sardor Soipov ham o'z hisobiga gol yozib qo'yishdi.

Birinchi davrada “Andijon”ning 11 nafar futbolchisi hakamlar tomonidan sariq, Alisher To'xtasinov esa qizil kartochka bilan jazolandi. Himoyachi Asror Rahmonov va hujumchi Akmal Jo'raboev hisobida ayni damda 3tadan sariq kartochka bor. Shuningdek, Bekzod G'ozievda ikkita, A.Qayumov, D.Tursunov, F.Hasanboev, S.Smorodin, R.Rahmonov, I.Ibragimov, A.Azizov va R.Qodirovda bitta sariq kartochka bor.

Birinchi davra yakuniy jadvali

#	Jamoalar	O'	YU	D	M	T-N	O
1	Andijon	8	7	0	1	27-5	21
2	Mashal	8	6	0	2	22-6	18
3	Xorazm	8	5	2	1	16-7	17
4	Qo'qon-1912	8	5	1	2	14-7	16
5	Zarafshon	8	5	1	2	20-15	16
6	Spartak	8	5	0	3	20-11	15
7	Istiqlol	8	4	2	2	13-10	14
8	Registon	8	4	1	3	13-14	13
9	Chust-Paxtakor	8	4	0	4	11-13	12
10	Oqtepa	8	3	2	3	13-15	11
11	Kosonsoy	8	3	1	4	10-15	10
12	Sherdor	8	2	1	5	9-16	7
13	NBU-Osiyo	8	2	1	5	5-17	7
14	Alanga	8	1	1	6	6-10	4
15	Paxtakor-2	8	1	0	7	8-27	3
16	Orol	8	0	1	7	5-21	1

“Andijon” birinchi davra g'olibi