Kechaning o'zida taqvim bo'yicha oltita uchrashuv o'tkazildi va bugun bo'lib o'tadigan “Lokomotiv” - “Navbahor” bahsidan so'ng 14-tur yakuniga etadi.

Musobaqa jadvalida oxirgi o'rinni egallab turgan “Andijon” Toshkentda “Paxtakor” mehmoni bo'lib, 0:2 hisobida imkoniyatni boy berdi. Birinchi bo'limda hisob ochilmagan bo'lsa, ikkinchi taymda maydon egalari raqib darvozasini javobsiz ikki bor ishg'ol qilishdi. Shuni aytish lozim, “Andijon”ning yangi bosh murabbiyi Sergey Shevchenko o'yinga kelgani bilan zaxira o'rindig'ida o'tirmadi. Ukrainalik murabbiy bahsni tribunada turib tomosha qildi.

O'yindan keyin bo'lib matbuot anjumanida ishtirok etgan “Andijon” katta murabbiyi Orif Mamatkazinga quyidagicha savol berildi, yani “Bugungi mag'lubiyatda Sergey Shevchenkoning zaxira o'rindig'ida o'tirmagani futbolchilarga tasir qildimi?”

Orif Ismoilovich savolga quyidagicha javob qaytardi:
“To'g'ri savol berdingiz. Darhaqiqat bu bahsda Sergey Yakovlevichning yo'qligi ham yigitlarga o'z tasirini ko'rsatdi. Ehtimol bosh murabbiy o'z o'rnida o'tirganida futbolchilarga qo'shimcha dalda bo'larmidi. Biz mashg'ulotlarda doim birgamiz, ammo o'yin boshqa, mashg'ulot boshqa”.

Endi savol tug'iladi: nima uchun Sergey Shevchenko zaxirada o'rindig'ida o'tirmadi? Birinchi sababi shuki, u kishida “Pro” licenziyasi yo'q, shu bois rasman bosh murabbiy sifatida faoliyat yurita olmaydi. Ikkinchidan, u kishining hujjatlarida qandaydir muammo bor deb eshitdik.

Shu bois PFL hozircha bu murabbiyni ro'yxatdan o'tkazmay turgan ekan. Katta ehtimol bilan “Pro”si bo'lmagan murabbiy klubda boshqa lavozimda ishlaydi, ammo keyingi uchrashuvlarda zaxira o'rindig'ida o'tiradimi-yo'qmi, bu borada aniq bir gap ayta olmaymiz. Hartugul oliy ligada qolish uchun harakat qilayotgan jamoa bosh murabbiysiz butun bir ikkinchi davrani o'tkazmasa kerak.

Xayrulla Xoliqov.

“Andijon” o'yiniga Sergey Shevchenkoning yo'qligi tasir qildimi?