Bu mashhur suhandonning chindan ham jozibali ohangi minglab muxlislar quloqlarida haligacha jaranglab turadi.
Asli buxorolik Rabbono Rahmonov 1957 yili, yani 17 yoshida Andijon tibbiyot institutiga o'qishga kirib, bu erda butun umrga qolib ketdi. Malum muddat o'zi bitirgan oliygohda ishladi, keyinchalik tibbiyot fanlari nomzodi darajasigacha ko'tarildi. 1981 yildan boshlab esa 20 yil davomida Andijon shahar yuqumli kasalliklar shifoxonasida rahbar lavozimida ishladi.

Qahramonimiz azaldan qalam ahli bilan oshufta edi. Ammo u kishining ijodkorligidan ham ko'ra, futboldagi faolligi har qancha tahsinlarga loyiq. “Navro'z” stadioni radiouzeli karnaylarida uzoq yillar davomida Rabbono Kamolovichning jaranglagan betakror va o'ziga rom etuvchi ovozi hali hamon barchaning yodida va haligacha ko'pchilik u kishining elon va malumotlarni shirali tarzda o'qib eshittirishini o'zgacha bir entikish bilan eslaydi va qumsaydi.

Ushbu qutlug' kunda biz Rabbono Kamolovichni ko'psonli o'zbek futboli muxlislari, yaqinlari, qadrdonlari nomidan tabriklaymiz-qutlaymiz! Otaxonga uzoq umr, sihat-salomatlik, bardamlik tilab qolamiz! Ilohim, Gulnoraxon ayamiz bilan keksalik gashtini uzoq yillar birga surishsin!

Yubilyarimizga, shuningdek, o'zbek futboli sharhlovchilarining otaxoni sanalmish Axbor Rustamovich Imomxo'jaev ham o'z tabriklarini yo'llaydi:
- Aziz va muhtaram Rabbono aka! Siz qadrli do'stimizning tavallud topgan kuningizga 75 yil to'lishi munosabati bilan chin ko'ngildan, yuragimiz qo'ri ila tabriklaymiz va qutlaymiz! Biz sizni futbolimizning chin manodagi fidoyi insoni sifatida, mashhur shifokor sifatida taniymiz va hurmat qilamiz. Men andijonliklar sizni o'zbek Yuriy Levitani deb atashlaridan o'z vaqtida boshim osmonga etgan. Siz bizni faxrimiz, qalbimiz, iftixorimiz va qalin do'stimizsiz. Sizdek buyuk inson bilan aka-uka tutinganligim bilan o'zimni baxtli deb hisoblayman. Go'zal kelinoyimiz bilan qo'sha qarib, farzandlar va nevaralar baxtiga doimo omon bo'ling! Siz azizimizning 100 yillik to'yingizda yoningizda o'tirib, qutlash va tabriklash kaminaga ham nasib etishini Yaratganning o'zidan so'rab qolaman. Sizni qattiq quchib, do'stingiz Axbor.

Ulug'bek Mirzaev,
“Andijon” FK sport direktori

Andijonliklarning qadrdon suhandoni - 75 yoshda!