Shuningdek olimpiya terma jamoasida ham Ashurov o'zini ko'rsatishga erishgandi. 27 yoshli qo'qonlik posbon joriy mavsumni o'zi tug'ilib o'sgan shahar jamoasida o'tkazdi. Yaqinda u bilan suhbatlashdik.

- Bu yilgi mavsumni birinchi ligada o'tkazdingiz. Liga haqida fikrlaringiz qanday?

- Birinchi liga o'yinlari juda yaxshi o'tdi. Umuman olganda, oliy liga bilan birinchi ligani taqqoslaydigan bo'lsak, bu erda teng kuchli jamoalar soni ko'p. Elitada esa “Bunyodkor”, “Paxtakor”, “Lokomotiv” hamda “Nasaf”. Ushbu to'rtta jamoa o'rtasida sovrinli o'rinlar xal bo'lmoqda. Qolgan jamoalarni esa hamma biladi, asosan o'rtamiyona o'rinlar uchun kurash olib borishadi. Birinchi ligada esa har bir o'rin uchun jiddiy kurash kechadi. Garchi 1-2-o'rin egalarining nomi muddatidan oldin aniq bo'lgan ersada, qolgan o'rinlar uchun bo'layotgan kurash jiddiy kechmoqda. Xususan 3-o'rin uchun “Qo'qon-1912” bilan “Zarafshon-NCZ” o'rtasida kuchli raqobat bo'layotganini ko'rish mumkin. Shuningdek yana bir nechta jamoalar ham qolgan o'rinlar uchun davogarlik qilmoqda. Ko'rayotgan bo'lsangiz o'yinlar ham ancha qiyin kechayotir. Misol uchun turnir jadvalining eng so'nggi o'rnida borayotgan “Alanga” bilan o'yinimiz og'ir o'tdi. “Sherdor”ni ham arang yutdik. Shu bois birinchi ligadagi o'yinlarni ham oson deb bo'lmaydi.

- Joriy yilgi chempionatni “Qo'qon-1912” 3-o'rinda yakunlashga juda yaqin turibdi. Bu sizlar uchun ayni damda qoniqarli natija bo'lsa kerak?

- Menimcha bu yil jamoamizning ishtiroki qoniqarli darajada bo'ldi. Mavsum boshida oldimizga vazifa qo'yilmagandi. Klub vice-prezidenti Baxtiyor aka Tolipovga katta rahmat. Shu kishining sayi harakatlari evaziga jamoaning moddiy-texnik bazasi baquvvat ko'rinishga keltirildi. Shundan so'ng bizda keyinchalik yuqori o'rinlarni egallash uchun kurashish imkoniyati tug'ildi. Bundan tashqari Tohir aka ham tajribali murabbiy. U kishi klubga kelgach o'yinimiz ham ijobiy tomonga o'zgara boshladi. Shuningdek davralar oralig'ida yangi o'yinchilar olib kelib raqobatni oshishiga sabab bo'ldi. Shu darajaga chiqishimizda bu mutaxassisning foydasi katta bo'ldi, deb o'ylayman.

- Bundan tashqari moddiy jihatdan klubning bu yilgi sharoitlari anchagina ijobiy tomonga o'zgarganini ham inkor etamasangiz kerak?

- Albatta, futbolda ko'p narsa baribir mablag'ga borib taqaladi. Chempionatning dastlabki turlari ortda qolgach, Qo'qon “Spirt” OAJ xomiylik qila boshladi. Shundan so'ng natijalarimiz ijobiy tomonga o'zgarib bordi. Bunday etibor va g'amxo'rlik uchun klubimiz mutasaddilariga va bizni qo'llab quvvatlab kelayotgan viloyat va shahar hokimlarimizga jamoamiz nomidan minnatdorchilik bildirib qolaman. Ochig'i, yil boshida 3-o'rinni egallaymiz deb o'ylamagandik ham. Chunki u paytda moddiy jihatdan klub baquvvat emas edi. Endi kelasi yil jamoa oldiga elitaga chiqish vazifasi qo'yiladi deyishmoqda. Bu maqsad yo'lida nasib qilsa astoydil to'p tepib, “Qo'qon-1912”ni kuchililar safiga olib chiqamiz.

- Tan olish kerak, o'tgan yili “Lokomotiv”da unchalik ham ko'p o'yin amaliyotiga ega bo'lmagandingiz. Bu yil esa “Qo'qon-1912”ning birinchi raqamli posboniga aylandingiz. Ishtirokingizdan qanchalik qoniqish xolsil qildingiz?

- Bu yil qanday o'yin namoyish etganim to'g'risida, munosib bahoni muxlislar bergani maqul. Lekin o'zimning joriy mavsumdagi faoliyatimdan ko'nglim to'ldi deya olaman. O'tgan yili oliy liga vakili “Lokomotiv” darvozasini qo'riqladim. U erda etarlicha o'yin amaliyotiga ega bo'lmaganimning sababi ko'pincha jarohat bilan bog'liqdir. Ochig'i, oxirgi yillarda jarohat qiynab yubordi. Tez-tez operaciya stoliga yotaverganimdan keyin, futbol o'ynash uchun xafsalam ham sovub borayotgandi. Qo'lqoplarimni mixga ilaman deb turganimda jamoamiz rahbarlari Baxtiyor aka Tolipov va Shuhrat aka Mo'minovlar shug'ullanib turishimni va yana avvalgi sport formamga qaytishim kerakligini aytib qolishdi. Bu borada qo'ldan kelganicha yordam berishlarini aytishganida yo'q deya olmadim. Bugungi kunga kelib esa hammasi ortda qoldi va bu borada nolimayman.

- Chempionatning ikkinchi bosqichi arafasida murabbiylar tajribali darvozabon Andrey Baklanovni ham ro'yxatdan o'tkazdi. U bilan bo'lgan o'zaro raqobat xususida nima deysiz?

- Andrey Baklanov bilan huddi aka-ukadekmiz. To'g'risi shaxsan men Andrey akaga raqobatchi emas, balki aka sifatida qarayman. Shuningdek Tohir aka Kapadze ham har ikkimizni birdek ko'radi. Bitta o'yinda Baklanov darvozani qo'riqlasa, keyingi safar men o'ynayman. O'rtamizda hech qanday raqobat yo'q.

- Bu yil jamoada moliyaviy muammolar bo'lmagani bilan bir qatorda “Qo'qon-1912” o'z bazasiga ham ega bo'libdi. Bunday etibor futbolchilarni ham xursand qilib yuborgan bo'lsa kerak?

- Klubda yaratib berilgan sharoitlarga gap yo'q. Hammasi ilgargidan ko'ra, durust. Oldin safar uchrashuvlariga o'sha kunning o'zida yo'lga chiqardik. Mashg'ulotlarga esa uydan qatnardik. Baza yo'q edi. Klubimiz rahbarlarining harakatlari tufayli mana hozirgi kunda o'z bazamizga egamiz, safar o'yinlariga ham 1-2 kun oldin borilmoqda. Oylik maosh bilan mukofot pullarini ham vaqtida olmoqdamiz. Buning uchun yana bir bor Baxtiyor akaga rahmat deb qolaman. Bu inson Qo'qonda futbol o'sishiga ancha yordam berdi. Shahrimizda millionlar o'yini yana avvalgi xolatiga qaytmoqda deyish mumkin. Yoshlar ham asta-sekin bo'y ko'rsatmoqda. Bunga Baxtiyor aka Tolipov sababchi bo'lib qoladi.

Islombek Rustambekov suhbatlashdi.

Aziz Ashurov: “Bunday etibordan juda mamnunmiz”