O'zbekiston chempionatining mart oyidagi eng yaxshi futbolchisi va murabbiyini aniqlash bo'yicha OAV xodimlari, jurnalistlar o'rtasida o'tkazilgan so'rovnoma 7-10 aprel kunlari bo'lib o'tdi. So'rovnomada jurnalistlar Oliy Liga klublarida faoliyat olib borayotgan 10 nafar murabbiy va 24 nafar futbolchini g'oliblikka davogar sifatida ko'rsatishdi.

Murabbiylar o'rtasidagi kurashda Paxtakor bosh menejeri Samvel Babayan, Olmaliq ustozi Igor Shkvirinni 19 ballga ortda qoldirib, mart oyining eng yaxshi murabbiyi deb topildi. Ushbu mutaxassis qo'l ostida Paxtakor mart oyida Oliy Liga-2014 doirasida uchta o'yin o'tkazdi va barchasida g'alaba qozondi. Jumladan, jamoa o'z maydonida Qizilqumni 1:0 hisobida mag'lub etgan bo'lsa, safarda Andijon va Neftchi jamoalari ustidan mos ravishda 1:0 va 2:1 hisobida g'alaba qozondi.

Futbolchilar orasida esa mart oyi yakunlariga ko'ra Paxtakor yarim himoyachisi Jamshid Iskanderovga teng keladigan futbolchi topilmadi. Paxtakorning mart oyidagi o'yinlarida Iskanderov gol urmagan bo'lsa-da, jamoasining ketma-ket g'alabalarida va oxir-oqibat Oliy Liga-2014 jadvalida yakka peshqadam bo'lib olishida muhim rol o'ynadi, o'zining chiroyli va aniq to'p uzatishlari bilan nafaqat muxlis va mutaxassislar olqishiga sazovor bo'ldi, balki jamoadoshlarining muhim gollariga-da hammualliflik qildi.

Malumot o'rnida, mart-noyabr oylarida o'tkaziladigan Oyning eng yaxshi futbolchisi va murabbiyi tanlovilarining natijalari umumlashtirib chiqiladi va natijalardan kelib chiqib, O'zPFLning 2013 yildagi eng yaxshi futbolchisi va murabbiyi nomi aniqlanadi.

Oyning eng yaxshi o'yinchisi so'rovnomasi mart oyi kuchli beshligi:
1. Jamshid Iskanderov (Paxtakor) – 82 ball.
2. Sherzod Hakimov (Olmaliq) – 47 ball.
3. Ivan Nagaev (Lokomotiv) – 42 ball.
4. Vohid Shodiev (Bunyodkor) – 27 ball.
5. Andrey Melnichuk (Dinamo) – 16 ball.

Oyning eng yaxshi murabbiyi so'rovnomasi mart oyi kuchli beshligi:
1. Samvel Babayan (Paxtakor) – 95 ball.
2. Igor Shkvirin (Olmaliq) – 76 ball.
3. Baxtiyor Ashurmatov (Navbahor) – 65 ball.
4. Vadim Abramov (Lokomotiv) – 33 ball.
5. Ro'ziqul Berdiev (Nasaf) – 26 ball.

Babayan va Iskanderov – mart oyi laureatlari!