Ушбу ўйиндан сўнг "лочинлар" устози Бахтиёр Ашурматовнинг фикрлари билан қизиқдик.

"Обод" бизга яхшигина дарс ўтиб берди. Бу жамоа ўтган йил биринчи лигада жуда яхши иштирок этганди. Ўйиндан олдин йигитларга осон баҳс бўлмаслигини айтгандим. Афсуски барчага бу гапларим етиб бормади шекилли...

Бугунги ўйин биз учун жуда керакли бўлди. Бир қатор ўйинчилар ҳақида хулоса чиқариш учун зарур эди. Таркибда 8 нафар асосий футболчини киритмадим. Уларни ўрнида ёшлар ва янги келганларни синаб кўрдим. Жамоага ёрдам бера олмайдиган ўйинчиларга жавоб берамиз. Тезроқ биз жамоамиз ўзагини аниқлаб олишимиз ва мавсумга тайёргарликни давом эттиришимиз керак", - дейди Бахтиёр Ашурматов.

- Легионерлар борасида фикрингиз?
- Очиғи легионерларнинг ҳаракатидан қониқмадим. Олий лига бошланишига 1 ой вақт қолди, уларни тайёрлаб 3-4 ой кута олмаймиз. Шу боис бизга тўла тайёр бўлган легионерлар керак.

- Жамоа билан узоқ муддат бирга бўла олмаганингиз "Навбаҳор"га таъсир қилмадими?
- Йўқ, бундай деб ўйламайман. Сабаби биринчи ва иккинчи йиғинда урғуни кўпроқ жисмоний тайёргарликка қаратилган. Ҳозир эса асосан ўйинлар орқали мавсумга тайёргарлик кўраяпмиз. Бир ойдан ортиқ вақт ичида жамоа ўйинини яхшилаб олишимизга ишонаман.

Ҳумоюн Давуров суҳбатлашди

Бахтиёр Ашурматов: "Легионерларнинг ҳаракатидан қониқмадим"