“Mashal” futbol klubiga endi ishga kirgan kezlarim Baxtiyor aka allaqachon futbolchilik faoliyatini tugatib, “Mashal”ning Toshkentdagi mamuri sifatida faoliyat yuritib kelayotgandi. Shu-shu Muborakda ish boshlaganimdan so'ng Baxtiyor Davlatov bilan tanishdim.

Baxtiyor aka hayotda ancha ochiqko'ngil, sofdil odam edi. U kishi oramizdan ancha erta ketdi. Hayot bo'lganida 44 yoshni qarshi olgan bo'lardi. U kishining engil mashinasida bir-ikki marta Yangierga borib kelganimizni juda yaxshi eslayman. Yo'l bo'yi faqat futbol haqida gaplashib ketardik. Baxtiyor aka futbolni juda yaxshi tushunar, mulohazalari ham ancha o'tkir edi. O'zi ham hujumchi bo'lgani uchun bo'lsa kerak, hozirgi hujumchilardan juda ko'p nolirdi. Oliy ligamizda har o'yinda gol uradigan hujumchilar kamayib ketdi derdi.

Baxtiyor aka mashinani tez haydashni yaxshi ko'rardi. Radar bo'lmagan joylarda “Epica”ni uchirib ketardi. Axir o'zi ham tezkor hujumchi bo'lgan ekan-da. Baxtiyor Davlatovning vafot etganini eshitib to'g'risi karaxt ahvolga tushib qoldim. To'g'ri, uning sog'ligi bezovta qilayotgani haqida eshitgandim. Bundan ikki-uch yilcha oldin operaciya ham bo'lgandi. Baxtiyor aka o'sha operaciyadan keyin ancha ehtiyotkor bo'lib qolgandi. Rejimga qattiq amal qilardi. Bunday o'ylab qarasam, u kishi bilan oxirgi bor ko'rishganimizga ham ancha bo'libdi.

O'z davrining yorqin hujumchilaridan biri Baxtiyor Davlatov endi oramizda yo'q. To'purar hujumchi juda ko'pchilik bilan yaqin munosabatda edi. Ayniqsa, “Mashal” futbol maktabida bolalar murabbiyi bo'lib ishlayotgan Vali Keldiev bilan juda qalin aloqada edi. Barcha Davlatovlar singari Baxtiyor aka ham boshqalarni hurmat qiladigan inson edi. O'tgan yilning yozida “Mashal” Toshkentda “Metallurg” bilan o'rtoqlik uchrashuvi o'tkazgandi. Fotoarxivimga qarab quyidagi suratni topib oldim. O'sha o'yinni ko'rish uchun Baxtiyor Davlatov ham kelgan ekan. Hayot – naqadar beshafqat, Siz suratda ko'rib turgan Shamil Tolipov bilan Baxtiyor Davlatov (sariq formada) yaqin-yaqingacha oramizda edilar. Afsuski, ular endi yo'q. Joylari jannatda bo'lsin.

Xayrulla XOLIQOV.

Baxtiyor Davlatovni xotirlab