Uchrashuvdan so'ng mehmonlar bosh murabbiyi Bekzod Qodirqulov fikrlarini bildirdi.

- Kurashlarga boy o'yin bo'ldi, bu oldindan malum edi. Ob-havo noqulay keldi, ammo buni bahona qilib bo'lmaydi. O'zimizni xatolarimiz tufayli mag'lubiyatga uchradik. Buning uchun muxlislarimizdan uzr so'raymiz. “Andijon” jamoasini g'alaba bilan tabriklayman. Ko'proq kurashlarga boy o'yin bo'ldi. Mazmunli, sifatli o'yin bo'lmadi, deb o'ylayman, - dedi Qodirqulov.

- Jamoa oldiga qo'yilgan asosiy vazifa qanday?

- Asosiy vazifa har bir o'yinda g'alaba qozonish. Xoh uyda, xoh safarda bo'lsin yutmoqchimiz.

- Superligaga chiqish maqsadi qo'yilganmi?

- Oliy maqsad har doim bor. Maqsad bo'lmasa, hayot ham bo'lmaydi. Superligaga chiqishni niyat qilganmiz.

- Ikkinchi bo'limda Siroj Melievni orqaroqqa olinishiga asosiy sabab nima bo'ldi?

- Hujumkor yarim himoyachi – Jahongir Abdusalomovni maydonga tushirdik. Orqaga olinmadi. Bizga hujum bo'lganida orqaroqqa o'tib yordam berishiga ko'rsatma bergandik. Harakat qildi.

- Tajribali himoyachi Abduqahhor Hojiakbarov nima uchun asosiy tarkibda maydonga tushmayapti?

- Uning jarohati bor edi. Jamoamizga qo'shilganida jarohati bor edi. Asta-sekin tiklanyapti va optimal formaga kirib boryapti. Albatta, bizga yordam beradi. Tajribasiga shubhamiz yo'q.

- Bugun maydonda “Andijon” jamoasining o'yini sizga qanday ko'rindi?

- Raqib haqida biror-bir fikr bildira olmayman. O'z klubim haqida gapiradigan bo'lsam, ikkinchi bo'limda ko'proq paslar orqali hujumda faollik ko'rsatdik. Aynan hujumchilarimiz yaxshiroq o'ynashni boshlashgach, imkoniyatlar paydo bo'ldi. Xuddi shu narsani birinchi taymda ham bajarishimiz kerak edi. Ko'rsatma shunday berilgandi. “Andijon” haqida esa gapira olmayman. Chunki o'z jamoamdagi muammolar o'zimizga etarli.

Bekzod Qodirqulov: "Maqsad bo'lmasa, hayot bo'lmaydi. Superligaga chiqishni niyat qilganmiz"