Shu kuni “Bunyodkor” o'z maydonida “Guliston”ni qabul qildi. Yodingizda bo'lsa, PFL bu yilgi bahslarda jamoalarning 1997-1998 yildagi bolalari ishtirok etishi lozimligini belgilab qo'ygandi. Bunyodkor futbol maktabida bo'lgan bahsda “qaldirg'ochlar”ning qo'li baland keldi.

Dastlabki daqiqalardan ikki jamoa hujumga zo'r berishdi. Ayniqsa, ilk daqiqalardan “Guliston” futbolchilarining qarshi hujumlari havfli ko'rinish oldi. Maydon markazida harakat qilgan “Guliston” futbolchisi Ilhom Anorqulov sheriklarini bir nechta qulay vaziyatga olib chiqdi. Biroq, qilinayotgan urinishlar samara bermadi. “Bunyodkor” ham o'z maydonida o'ynayotganligini unutib qo'ymadi va qator hujumlar qildi. Faqat, hal qiluvchi zarbaga kelganda ikki jamoadan ham omad yuz o'girdi. “Guliston” murabbiyi Abbos Ergashev ko'proq shogirdlaridan xushyorlik bilan harakat qilishlarini talab qildi. Shuning uchun ham “qaldirg'ochlar” jamoasi vakillari gol urishlari oson bo'lmadi. Nihoyat, birinchi taymning so'ngillarida mezbonlar o'z maqsadlariga erishdi. Qanotdan etkazilib berilgan to'pdan so'ng, “Bunyodkor” hujumchisi bosh bilan zarba berib, hisobni ochdi. Oradan bir necha daqiqa o'tib, yana qanotdan uzatilgan to'pdan keyin, “Bunyodkor” hisobni yanada oshirdi, 2:0. Ikkinchi taymda yosh qaldirg'ochlar yanada ko'proq hujumga zo'r berishdi va natijada uchta to'p kiritishdi. Abbos Ergashev ham tanaffusdan keyin, tarkibni kuchaytirish istagida o'zgartishi qildi. Bu o'zgarishlar esa amalda o'z samarasini bermadi.

Uchrashuvdan keyin mehmonlar ustozi Abbos Ergashevning fikrlarini tingladik:
Abbos Ergashev (“Guliston” murabbiyi): - O'yin ancha qiziqarli tarzda o'tdi. Birinchi taymni yaxshi boshlagandik. Dastlabki 20-daqiqa oralig'ida tengma-teng to'p surayotgandik. Keyin, raqibning hujumlari natijasida gol qo'yib yubordik. Keyin yana xatolarga yo'l qo'yganligimiz hisobni yiriklashib ketishiga olib keldi. Bunyodkor futbolchilari ham kuchli ekanligini ko'rsatishdi.

- O'yin shunday hisob bilan yakuniga etishini oldindan taxmin qilganmidingiz?
- Yo'q, albatta. Agar hisobni bunday ko'rinish olishini bilganimizda, uchrashuvga kelmasdik ham. Biz kamida durang uchun maydonga chiqqandik. Harqalay shunga umid qilgandik. Boya aytib o'tganimdek, bir nechta xatolarimiz sababli, mag'lubiyatga uchradik. Bo'lmasam, uchrashuvda tenglik keltira olishimiz ham mumkin edi.

- Qolgan bahslardan nimalarni kutyapsiz?
- Iloji boricha g'alaba qozonishga harakat qilamiz. Endilikda, biz ikki uyda va bitta safarda harakat qilamiz. O'ylaymanki, bu bellashuvlarda g'alaba qozona olamiz. Shogirdlarimni kuchiga ishonaman, keyingi bahslarda vaziyatni o'nglashga harakat qilamiz.

“Bunyodkor” – “Guliston” - 5:0
Bunyodkor futbol maktabi.
“Guliston”: Sardor Mo'minov, Yo'ldosh G'ofurov, Shahzod Turdibekov, Doniyor Qosimov, Bobur No'monjonov, Diyor Hazratqulov, Ilhom Anorqulov, Rustam Hazratqulov, Mirjalol Mamasoliev, Izzatbek Abduvahobov, Botir Begimqulov.
Zaxiradan tushganlar: Azamat Saidov, Shohruh To'htaboev, Dilshod Nasrullaev, Ismoil Nuriddinov, Bekzod Anorboev.

Izzatbek Abduvahobov

“Bunyodkor-97” - “Guliston-97” 5:0