Jamoaning so'nggi turlardagi o'yinlari qoldirilganligi sabab turnir jadvalidagi raqobatchi jamoalar peshqadam bilan oradagi farqni qisqartirishga erishgandilar. Shu bois Dinamo oldida raqibni mag'lub etishdan boshqa maqsad yo'q edi.

Uchrashuvni hujumkor boshlagan maydon egalari tezkor qanotlar orqali raqib jamoa darvozasi oldida xavf tug'dira boshlashdi. Natijada o'yinning 12-daqiqasida o'ng qanotdagi tezkor va faol o'yinlari bilan ajralib turgan Jonibek Ko'chimov chap qanotdan uzatilgan to'pni jarima maydonida qabul qilib olib, kuchli zarbasi bilan himoyachi va darvozabonni dog'da qoldirdi, 1:0.

Ushbu goldan so'ng maydon egalarida yana bir qator vaziyatlar bo'lsada, tanaffusda jamoalar kichik hisob bilan chiqib ketishdi. Ungacha esa qanot hakami Aleksey Nikolaevning bosh bilan kiritgan golini ofsayd deya inobatga olmadi.

Ikkinchi bo'limni ham hujumkor boshlagan Samarqand jamoasi vakillari, bo'limning 30-soniyasidayoq hisobdagi farqni ikkitaga oshirishdi. Qanotdan etkazib berilgan to'p hujumchilardan o'tib yarimhimoyachi Saidjamol Davlatjonov kelib tushdi, u esa ajoyib aylanma zarbasi bilan raqib darvozasining uzoq burchagini aniq nishonga ola bildi, 2:0.

Ushbu goldan keyin mezbonlar hisobni yanada yirik ko'rinishga olib kelishlari mumkin edi, ammo Viktor Klishin, Amirjon Safarovlarga vaziyatlarni golga aylantirishda omad etishmagan bo'lsa, Doston Ibragimovning goli o'yindan tashqari holat deya inobatga olinmadi.

Nihoyat, o'yin yakunlanishiga yaqin qolganda hisob yirik ko'rinish oldi. Doston Ibragimov jarima maydoniga yorib kirib, to'pni tajribali hujumchi Alisher Xoliqovga uzatdi. Mohir forvard esa sovuqqonlik bilan raqib darvozasiga o'yindagi uchinchi golni kiritib, muxlislar quvonchiga sabab bo'ldi, 3:0.

Chempionatdagi 20-o'yinda 18-g'alabani o'z hisobiga yozib qo'ygan Dinamo 55 ochko bilan peshqadamlikni mustahkamlab, maqsadi sari dadil odimlashda davom etmoqda.

Birinchi Liga. 26-tur.

15 sentyabr (payshanba)

Dinamo (Samarqand) – Zomin (Zomin) – 3:0

Samarqand, 1752 tomoshabin.

Hakamlar: R. Abduvohidov (Qarshi) – 8,0, A. Burov (Buxoro) – 8,3, SH. Rahmatov (Buxoro) – 8,3, A. Ahtamov - 9

Nazoratchi: SH. Bozorov (Namangan).

Gollar: Jonibek Ko'chimov (12), Saidjamol Davlatjonov (46), Alisher Xoliqov (81).

Dinamo: Mixail Naumov, Ubaydullo Nabiev, Aleksey Nikolaev, Mirkomil Lokaev, Firdavs Abdusalimov, Iskandar Xolmirzaev (Komil Sharofutdinov, 38), Omadjon Tayloqov (Laziz Nuriddinov, 80), Saidjamol Davlatjonov, Jonibek Ko'chimov (Doston Ibragimov, 70), Amirjon Safarov (Alisher Xoliqov, 60), Viktor Klishin (Islom Sharipov, 75).

Zomin: Sherzodbek Abduraimov, Shuhrat Sadirdinov, Usmonbek Mansurov, Eldor Karimov, Umrilla Ramazonov, Shukurullo Joniqulov, Durbek Kamolov, Feruz Mahmudov, Dostonbek Toshmatov, Sultonbek Nurunov, Folibjon Sariboev.

Ogohlantirishlar: S. Nurunov (27), F. Sariboev (Zomin, 50).

"Dinamo"ning dadil odimi davom etadi