Фақат бизни ҳайрон қолдирган томони шу бўлдики, тажрибали дарвозабон Ғайрат Ҳасанов иккинчи давра бошланиши арафасида клубни тарк этди. Нима сабабдан жамоа сардорининг бундай йўл тутганлиги кўплаб саволларни келтириб чиқаряпти. Шу сабабли Ғайрат билан суҳбатлашишга қарор қилдик.

- Авваламбор халқимизни мустақиллик, эркинлик, озодлик байрами билан чин қалбимдан табриклайман, деб гап бошлади Ҳасанов.

- Ўзингизга яраша мухлисларингиз борлигини яхши биламиз. Шуни ҳисобга олганда, фаолиятингиздан роҳат оляпсизми?
- Футболчи бўлиш менинг мақсадим эди ва бунинг учун Худога шукур қиламан. Ёшлигимда футбол мактабида таҳсил олдим. Ота-онамнинг насиҳатларига амал қилдим ва уларнинг ниятларини оқладим деб ўйлайман. Бир сўз билан айтганда, фаолиятимдан қониқяпман. Чунки футбол мен учун ҳали якунлангани йўқ.

- Иккинчи даврада “Нефтчи”да кўринмай қолганингизнинг сабаби нима билан боғлиқ?
- “Нефтчи”да ишлаётган мураббийлар хоҳлаган футболчини ёрдам беради, хоҳлаганини ёрдам бера олмайди деб қарор чиқаришлари мумкин. Чунки натижа учун улар жавоб беришади, шу боис ҳам жамоа ўшаларга ишониб топширилган. Менга айтишдики, “чарчагансан, қолаверса клубга халақит беряпсан” дейишди. Айтган гапларини ҳурмат қилган ҳолда “хўп” дея жамоани тарк этишга мажбур бўлдим.

- Нима учун халақит қиляпман, нега кетишим керак деган саволлар пайдо бўлмадими?
- Бундай саволлар бўлди. Аммо уларга ўзимдан жавоб топишни хоҳламадим. Чунки инсон борки хато қилади. Ҳаммасини вақт кўрсатади. Бунинг учун сабр қилиш керак. Мен билан ҳамкорлик қилишни исташмагани боис тинчигина кетдим. Вақти келиб жамоа натижа кўрсата олмаса, мухлисларнинг ишончини оқлай олмаса улар ҳам ўз жойини бўшатиб қўядилар деб ўйлайман.

- Жамоа сардори сифатида ҳаракат қилдингиз ва айрим учрашувларда энг яхши ўйинчи номига ҳам эришдингиз. Лекин “Нефтчи”ни тарк этиш учун қачон ва қайси вазиятда хато қилдим деб ўйлайсиз?
- Боя ўзингизга саволлар бердингизми деб сўрадингиз-ку, назаримда мухлислар мени яхши кўришади. Ҳозирги мураббийларни баъзида тушунмай қоламан. Улар худди футболчиларнинг ролини ўйнашни истаб қолишади. Аммо футболчининг ва мураббийнинг йўли бошқа. Футболчи майдонга тушганида эркинроқ ва мухлислар учун тўп суриши лозим. Мураббий эса ўз фикри билан ишқибозларга ёқишга ҳаракат қилади. Балки ишқибозларнинг менга бўлган ишончи ортиқроқдир.

- “Нефтчи”ни тарк этгач иккинчи даврани бошқа жамоада бошлаш имконияти қолмаганмиди?
- Агар бир ой олдин у ердан кетганимда бошқа клубга ўтиш имкониятим пайдо бўларди. Чунки бўлиб ўтган ишлардан кейин инсон 3-4 кун дам олиши ҳамда руҳий томондан ҳам ўзига келиб олиши лозим. Мени эса иккинчи давра бошланишига 3-4 кун қолганида кетказишди. Бундай вазиятда бирор-бир йўлни танлаш қийин. Бундан кўра дам олганим фойдали деб ҳисобладим.

- Барибир фаолиятингизни давом эттиришингиз керак-ку! Шу боис режа ва мақсадларингиз қандай?
- Фарғонада янги стадион таъмирдан чиқариляпти. Яқинда у ерга “Нефтчи”нинг ўйинини кўриш ва олқишлаш мақсадида 20 000 ва ундан кўпроқ мухлислар йиғилишади. Тез орада Фарғонада чинакам футбол ўйнайдиган пайт келади. Бу ерда янги тарихни ёзиш лозим. Барибир “Нефтчи”да тўп суриш ниятим бор.

- Эронга кетишингиз ҳақида ҳам хабарлар пайдо бўлди. Бу ҳақиқатга яқинми?
- Ҳа, шундай. Эронликларга дарвозабон зарур бўлиб қолди ва менинг тезроқ келишимни исташди. Аммо паспортимни ҳали янгиламагандим. Шунинг учун янги паспортни қўлга киритишим бироз чўзилиб кетди. Бундан ташқари ўзим ҳам кўпроқ дам олдим. Жамоасизман ва бир ойдан бери футбол ўйнаганим йўқ. Нима бўлганда ҳам бир ўзингиз машғулот қилгандан кўра, жамоа билан шуғулланганингиз яхшироқ.

- Фаолиятингизни Эронда давом эттириш ниятингиз борми?
- У ерга боришдан кўра кўпроқ “Нефтчи”да тўп суриш мақсадим бор.

- Эроннинг қайси клуби сизга қизиқиш билдирганди?
- Тўғриси, ҳали Эронга кетишим 100 фоиз ҳал бўлмаганлиги боис қайси жамоа эканлиги билан унчалик қизиқмадим. Негаки, боя айтганимдек, паспортим билан боғлиқ муаммоим бор эди. Уларга қачонки, янги паспортимни олсам кейин қўнғироқ қиламан деганман. Лекин ҳозир ҳам янги паспортга эга бўлганим йўқ.

- Агар ишларингиз ҳал бўлса, уларга қўнғироқ қиласизми?
- Тўғрисини айтадиган бўлсам, шу ерда қолмоқчиман. 31 ёшга тўлдим. Агар фаолиятимни югуриш ҳолатига қиёсласам, 300 метр масофани босиб ўтдим, яна охирги 100 метр қолди. Шу сабабли ҳамма нарсани пухта ўрганиб шунга арзийдиган қарорни қабул қилишим муҳим. Мен учун арзийдиган жой эса “Нефтчи”. Бу ерда футбол ўйнаш мен учун ёқимли, мазза ва қулай. Футболда ўзим хоҳлаган натижаларга эришишим мумкин бўлган жамоа “Нефтчи”дир.

- Яна бу ерга қайтишингизга ишончингиз комилми?
- Албатта. Ҳамманинг ўзига яраша нияти бор. Кўпчилик қайтишим тарафдори бўлмоқда. Қачондир “Нефтчи”га қайтаман деб умид қиламан. Бунинг учун яхши ният қилишдан тўхтамайман.

- Собиқ жамоангизнинг ўйинларини стадиондан кузатяпсизми?
- “Насаф” билан ўйинни стадионда томоша қилдим. Гап шундаки, иккала жамоа ҳам мен учун қадрли ҳисобланади. “Нефтчи”ни ҳам, “Насаф”ни ҳам ҳурмат қиламан. Шу сабабли дўстона руҳда учрашувни кузатиб бордим.

- “Нефтчи”нинг бу йилги мавсумдаги имкониятлари хусусида нималарни айта оласиз?
- Фарғона футболи керак бўлса эртагаёқ “уйғониб” кетиши мумкин. “Нефтчи”да доим ўзига нисбатан ишонч бор. Клуб охирги ўринларда бўлса-да, бу ерда тўп сураётган ҳеч бир футболчи уялмайди. Шундай кунлар келадики, жамоа яна совринларни қўлга киритади. Бундай муваффақиятларни Фарғона халқи соғинган. Мана шундай мақсад учун ўйнаса арзийди. “Нефтчи” доим грандлар қаторида бўлган. Афсуски, ҳозирги жамоа аутсайдерлар билан рақобатлашиб юрибди.

- Барибир бу йилги мавсумдаги имконияти ҳақида аниқ жавоб бермадингиз. Сизнингча, клуб нечанчи ўринни эгаллаши мумкин?
- “Нефтчи”нинг 5-ўринни қўлга киритишини истайман. Аммо жамоа учун 10-ўринни олиш хавфи ҳам бор.

- “Нефтчи”дан кетганингизни ҳар ким турлича қабул қилди. Характерингиз оғирроқ эканлиги ҳақида кўп гапирилади...
- Бундай гап-сўзларга тўғри муносабатда ёндошаман. Ҳар доим тўғри сўз бўлишга одатланганман. Майдонда ҳам, майдондан ташқарида ҳам жамоа манфаати учун курашиб келганман. Ҳар сафар ўз фикримни билдиришни хоҳлайман. Ҳамма нарсани вақт кўрсатади.

- Клубдан кетиб афсусланмадингизми?
- Бундай жамоада эмаслигимдан афсусдаман. Ўқув-йиғин пайтларида кунига уч маҳал шуғулландим. Футболчилар билан 5-ўрин учун курашишимизни маслаҳатлашиб олгандик. Келаси мавсумда медаллар сари интилишимиз учун бу йил ниманидир исботлашимиз лозим эди. Лекин ўйлаган ишларимиз амалга ошмаяпти. Шахсан мен кутган нарсалар бўлмаяпти.

- Энди мавсум охиригача бекор юришга мажбурсизми?
- Бекор юрмайман. Шифокор билан гаплашдим, бўш вақтларимда соғлигимни яна бир бор текширтириб оламан. Ниятим келаси йилга ҳар томонлама тайёр ҳолатда етиб келмоқчиман. Худо сендан ҳаракат, мендан баракат дейди. Шунингдек, фарзандим билан тарбияси билан ҳам машғул бўляпман. Ўйлашимча, кейинги мавсумдан савия ва шиддат янада ортади ва футболимизнинг мавқеи бир поғонага кўтарилади. Чемпионатимиздаги мураккаблик бундан-да ортади деб ўйлайман. Кўплаб янгидан-янги стадионлар барпо этилмоқда. Бу ҳам футболимизнинг ривожланишга катта туртки беради.

ФИРДАВСХОН суҳбатлашди.

Ғайрат Ҳасанов нима учун “Нефтчи”дан кетишга мажбур бўлди?