- O'yin haqida nima deyishim mumkin, og'ir bahs bo'ldi. To'g'risini aytsam, durangga ham tayyor turgandim. Yigitlar harakat qilishdi, bor kuchi bilan mehnat qilishdi va g'alabani ilib keta olishdi. Bugun zaxiradan tushganlar o'yinni yaxshilay olishdi. Jamoada bir qancha yaxshi vaziyatlar bo'ldi. Futbolchilardan mamnunman, ular yaxshi harakat qilishdi va kerakli 3 ochkoni qo'lga kiritishdi. Yoqimli bayram bo'ldi. Shu sababli muxlislarni, klub rahbariyatini g'alaba bilan tabriklayman. Barchasidan mamnunman.

- Bu g'alaba navbatdagi o'yinga ishtiyoq bera oladimi?

- Albatta. Chunki biz so'nggi pog'onadan ko'tarildik. Albatta, ishtiyoq taqdim qiladi. Bugun biz uchun muhim o'yin edi. Yigitlarning harakatlaridan qoniqish hosil qildim.

- O'tgan o'yindagi matbuot anjumanida muammolar haqida gapirgandingiz. Bu muammolar hal bo'ldimi?

- Yo'q, bu hali jarayonda. Kutyapmiz.

- Yozda tarkibga qo'shib olinadigan futbolchilarni ro'yxat qilib oldingizmi?

- Hozircha holatimiz bunga yo'l qo'ymayapti. Bizda short-list yo'q. Ishlar hal bo'lganidan keyin birga o'tirib, o'ylaymiz. Agarda holat o'tgan yilgidek bo'lsa, balki, ishlar yaxshiroq bo'lishi mumkin.

- Birinchi bo'limda Bobur Amanov hujumda o'ynadi.

- Bu borada o'tgan yili gapirganman. 2010 yili "Buxoro" bosh murabbiyi bo'lganimda, biz birinchi ligada edik, Bobur esa mening hujumchim bo'lgan. O'shanda u bir mavsumda 11ta gol urgan. Keyinchalik himoyaga o'tgandi. Murabbiylar bilan birgalikda uning to'pni ushlab tura olishini inobatga oldik. U jarohatidan keyin endi tiklanish jarayonini boshdan kechiryapti.

- "G'ijduvon"ga g'alaba uchun nimalar etishmayapti?

- Jamoaga etibor etishmayapti. Agarda ishlar boshqacha ketsa, yaxshiroq etibor qarata olishsa, normal darajadagi mashg'ulot jarayoniga imkon berishsa, yigitlarda kuch ham paydo bo'ladi va barchasi boshqacha bo'ladi.

- "Aral"ning o'yini haqida nima deya olasiz?

- Juda yaxshi jamoa. Ularning bugun tezkor o'yin ko'rsatishini kutgandik. Og'ir o'yin o'tkazdik va yana omadimiz keldi. Omad sababli so'nggi daqiqada g'alaba golini urdik.

Gennadiy Kochnev: "Yana omadimiz kelib, g'alabaga erishdik"