Chindan ham Hislat Chilmatov, Bobur Akbarov, Nosir Otaqo'ziev, Sobir Usmonxo'jaev, Ibrohim Rahimov hamda Alisher Shog'ulomov kabi futbolchilar bugungi kunda jamoa bilan birga emas. Jiddiy yo'qotishlarning sababi esa yuzaga kelgan moliyaviy muammo bilan bog'lanmoqda. Albatta, tan olish kerak, bugungi kunda futbolda ko'p narsa moddiy jihatga bog'liq bo'lib qoldi.

Jamoa bosh murabbiyi Baxtiyor Ashurmatov o'z chiqishlarida har qanday xolatda ham "Guliston"da qolib mavsum oxiriga qadar ishlashini aytib o'tgandi. Shu bois Ashurmatov bugungi kunda klubning ichki imkoniyatlaridan kelib chiqib, imkon qadar futbolchilarni ikkinchi davra bahslariga tayyorlab bormoqda. Yo'qotishlar o'rnini to'ldirish uchun bir qator yoshlar ko'rikka taklif etilgan. Ularning orasida "Paxtakor" azosi Sergey Rekunni ko'rish mumkin. Shuningdek o'rinbosarlar tarkibidan ham bir talay futbolchilar asosiy jamoaga jalb etilgan.

Bugun jamoa Toshkentda "Neftchi" bilan o'rtoqlik uchrashuvni o'tkazdi.

"Guliston": Doniyor Usmonov, Mirjalol Qurbonov, Jasur Otajonov, Akbar Sattaev, Tohir Shamsiddinov, Sarvar Jo'raev, Hurshid Yo'ldoshev, Robbim Hasanov, Zafar Qoraqulov, Nodir Teshaboev, Sergey Rekun.
Zaxiradan tushganlar: Konstantin Boev, Rustam Qodirov va bir qator yoshlar.

Garchi tarkibi yosh futbolchilardan tashkil topgan bo'lsada, mazkur bahsda "Guliston" raqibiga jiddiy qarshilik ko'rsata olganini aytib o'tish kerak. Uchrashuvda birinchi bo'lib hisobni Sarvar Jo'raev ochdi. Shundan so'ng, "Neftchi" tarkibida to'p surgan Pavel Smolyachenko va Mirzakamol Kamolov raqib darvozasiga to'p kiritib, jamoasini hisobda oldinga olib chiqishdi. Ikkinchi bo'limning o'rtalariga kelib esa Guliston zaxirasidan maydonga tushgan Boev va Qodirov ham shu kuni o'z hisobiga bittadan gol yozdirib qo'yishdi. Uchrashuv oxirlarida esa "Neftchi"da ko'rikdan o'tayotgan Mo'ydin Mamazulumov bahsdagi so'nggi golni kiritib, hisobni 3:3 ko'rinishini taminladi.

Birinchi davrada "Guliston" sharafini himoya qilgan Bobur Akbarov va Alisher Shog'ulomov mazkur o'yinni muxlislar qatorida kuzatishganini ham aytib o'tish kerak.

Islombek Rustambekov

"Guliston" bugun "Neftchi" bilan kuch sinashdi