Aniqrog'i, premer liga ishtirokchisi “Yavor” murabbiylarida qiziqish uyg'otgan hujumchimiz, bugungi kunda ushbu jamoada ko'rikdan o'tmoqda. Kecha 19 yoshli hujumchimiz yangi jamoasidagi ilk o'yinini o'tkazdi. Mahalliy jamoalardan biriga qarshi kechgan bahsda G'ofurov birinchi bo'limda to'liq harakat qildi. Jamoasi esa 2:0 hisobida mag'lubiyatga uchradi. Mazkur o'yindan keyin, Husniddin bilan qisqacha suhbatlashdik.

- Husniddin, adashmasak, “Yavor” libosida bugun birinchi o'yiningizni o'tkazdingiz. Shu bois ilk uchrashuvdagi taassurotlaringiz bilan o'rtoqlashsangiz.
- Ha, shunday. O'yin yaxshi kechdi. Mazkur bahsda murabbiylar menga bir taym o'ynash imkonini berishdi. Ammo biz mag'lubiyatga uchradik. O'rtoqlik o'yini bo'ilishiga qaramay, tribuna muxlislar bilan deyarli to'ldi.

- Jamoa o'yiniga moslashib, kirishib ketishingiz uchun ko'proq kim va nima yordam bermoqda?
- Barcha futbolchilar meni yaxshi qabul qilishdi. Ular imkon qadar menga har jabhada yordam berishmoqda. Ochig'i, hech qanday muammo yo'q bu borada. Barchaning munosabati alo darajada bo'lmoqda.

- “Yavor”, umuman aytganda, Ivanica shahri to'g'risida nima deya olasiz?
- Bilsangiz kerak, ushbu jamoa o'z tarixiga egadir. Klubda barchasi professional tarzda ekanligini ko'rish mumkin. Shaharga kelsak, Ivanica Serbiyaning u qadar katta shahri emas ekan. Lekin shunga qaramay, bu er menga juda yoqdi.

- Bosh murabbiy Bogicha Bogichevich va uning o'tkazayotgan mashg'ulotlari to'g'risida ham aytib bersangiz?
- Mashg'ulotlar yuqori saviyada o'tkazilmoqda. Bu er xar holda evropa. Jamoada ham haqiqiy professional futbolchilar yig'ilgan. Bogichevich xususida ham ijobiy fikrlarni bildirishim mumkin. Bosh murabbiy bazi-bazida menga kulib qo'yadi.

- “Yavor”da murabbiylar ko'proq nimalarga etibor qaratishadi. Jamoaning o'yin uslubi qanday?
- Bu erda ko'pincha texnikaga etibor qaratilar ekan. Shuningdek hujumlar asosan qisqa paslar orqali tashkil etiladi.

- Ko'pchilik muxlislar Serbiya premer ligasi ishtirokchisi bo'lgan klubda ko'rikdan o'tayotganingizdan xabar topgach, evropa jamoasida qolib, o'zingizni ko'rsatishingizga tilakdosh bo'lmoqda. Aytingchi “Yavor”dagi taqdiringizga qachon oydinlik kiritiladi?
- Bugungi sinov-nazorat o'yini orqali murabbiylar futbolchilarning imkoniyatini tekishirib olishgan bo'lsa ajab emas. Jamoadagi kelgusi taqdirim qanday kechishi ochig'i, hozircha mavhum. Bu masala, 2-3 kun ichida hal etilsa kerak nazarimda.

- Jamoada qolish uchun mashg'ulotlarda bor kuchingiz bilan ishlayotgan bo'lsangiz kerak. Har xolda evropa jamoasida o'ynashni barcha futbolchi orzu qiladi.
- Albatta, har bir mashg'ulotda astoydil ter to'kyapman. Niyatim ham ushbu jamoa bilan shartnoma tuzib, o'zimni ko'rsatishdir. Lekin ko'p narsa murabbiylarga ham bog'liq.

- Husniddin, sizga so'nggi savolim quyidagicha, o'z vaqtida Qozog'istonning “Shaxtyor” klubi ko'rigida ham bo'lib qaytgandingiz. O'shanda Viktor Kumikov jamoasiga o'tishingizga nima yo'l qo'ymagandi?
- Ha, “Shaxtyor” yig'inlarida ham malum muddat ishtirok etganman. Bilasizmi, o'shanda xorij jamoasiga birinchi bor taklif etilgandim. Biroz yoshligim sababli balki, ozgina xayajonlanish bo'lgandir...Boshqa muammo yo'q edi.

Islombek Rustambekov suhbatlashdi.

Husniddin G'ofurov: “Ivanica va “Yavor” menga juda yoqdi”