Bunda o'smirlarimiz Falastin va Yamanga qarshi maydonga tushishadi. Ungacha esa 18 sentyabrda Qatar bilan o'rtoqlik uchrashuvi o'tkaziladi.

Mana shu o'yinlar uchun hali o'smirlarimizning ro'yxati elon qilingani yo'q. Lekin bizga malum bo'lishicha, terma jamoa ustozi Temur Olimxo'jaev “Mashal”dan yosh iqtidor egasi Adham Abdullaevni chaqirmaslikni maqul ko'rgan. Murabbiy “Mashal” futbol maktabidan uch nafar futbolchini taklif etdi. Bular – Ilhom Alijonov, Rahim Sharipov va Abubakir Murtazoev. Lekin ular orasida Adham Abdullaev yo'q.

Aslini olganda, hujum chizig'ida to'p suradigan Adham iqtidorli futbolchilar sirasiga kiradi. Unda golni sezish qobiliyati juda kuchli. Taqqoslash uchun Jamshid Iskanderov o'z yoshida va to'p surayotgan chizig'ida qanchalik kuchli bo'lsa, Adham Abdullaev ham o'z tengqurlari orasida shunchalik zo'r. Buni men Adhamning o'yinlarini bir necha bor ko'rgan jurnalist sifatida aytyapman.

Lekin mana shunday iqtidor egasini negadir Temur Olimxo'jaev terma jamoaga chaqirmayapti. To'g'ri, unda malum vaqt oldin yuragi bilan bog'liq muammolar bo'ldi va shundan so'ng “Mashal” futbol klubi rahbariyatining ko'magi tufayli futbolchi davolanib chiqdi. Hozir esa u bemalol to'p tepmoqda.

Shu yilning avgust oyida Toshkentda bo'lib o'tgan “Paxtakor-79” ananaviy xotira turnirida “Mashal-98” ham qatnashib, musobaqada ikkinchi o'rinni egalladi. Va ushbu musobaqaning “Eng yaxshi hujumchisi” deb aynan Abdullaev Adham topildi. “Mashal-98” bosh murabbiyi Nikolay Lapaning aytishicha, turnir davomida Adhamning o'yinlari terma jamoa bosh murabbiyida iliq taassurot qoldirgan va keyinchalik yig'inga chaqirishini malum qilgan.

Ammo Turkiyadagi yig'inga Abdullaev olib ketilmadi, sabab sifatida esa viza vaqtida tayyor bo'lmagani aytildi. Turkiya-ku mayli, lekin Toshkentdagi mana endi boshlanadigan yig'inga chaqirsa bo'lardi-ku. Bundan kelib chiqib qanday xulosaga borish mumkin? Viza shunchaki bahona vazifasini o'tagan bo'lishiyam mumkin. Yo'qsa murabbiy hujumchini albatta terma jamoaga taklif etgan bo'lardi. Xullas, ayni paytda shunday darajadagi futbolchining o'smirlar terma jamoasiga nima uchun chaqirilmayotganidan ko'pchilik hayron.

Xayrulla XOLIQOV.

Iqtidorni payqay olmayotgan murabbiy